E pei ona sa faaalia i la tatou Sooatulau o le vaiaso na tea nei, e toe alu atu se lipoti o lenei feiloaiga pe a taunuu ma faatinoina.
O le Aso Lua na tea nei i le afiafi toafilemu na faatumuina ai le maota o le EFKS i Cannons Creek i le faatasi atu o le auvalaaulia i malo faaaloalogia ma i latou na maua pepa e ulufale ai i lenei feiloaiga matagofie na faatinoina e le Ofisa o le Komesina Sili ia Leasi Papaalii Scanlan ma le Mafutaga a Faifeau i le Laumua mo le ‘au taitoafitu a lo tatou atunuu.
Na amataina le feiloaiga i le sauniga lotu na feagai lea ma le Taitaifono o le Mafutaga a Faifeau i Ueligitone le susuga ia Rev Tauinaola Tofilau, ona sosoo ai lea ma le saunoaga faafeiloai a le saunoaga a le Afioga i le Komesina Sili o Samoa afioga ia Leasi Papaalii Scanlan sa faafeiloai aloaia atu i le taitai malaga ma le ‘au atoa aemaise foi o malo faaaloalogia faapea le aofia.
Na ia faafetai foi i le Mafutaga a Faifeau i le lagolagoina o lo latou Ofisa i tapenaga uma. Sa sosoo atu ai ma le saunoaga a le Minisita o Tagata Pasefika, afioga Peseta Sam Lotu-Iiga. O le faalototele lava i le ‘au ma le fiafia e faafetaia le Mafutaga a Faifeau ma le Ofisa o le Komesina Sili i lenei tapenaga tele mo le ‘au a Samoa.
Na faafofoga loa le aofia i le fetalaiga ia Vala Ualemai o le tama tuai o le ‘au taitoafitu a Samoa. Sa mālie foi i le faafofoga a le aofia i ana faamaninoga o le feagai ai ma tama taaalo pe a i luga o le malae.
Na ia faaalia foi uiga o tatou tagata pe a faaletonu le taaalo a tama. O se fetalaiga na matuā fiafia ma taliē ai le aofia i lona faaali tino lava o le tulaga e iai lo tatou atunuu pe a faaletonu le ‘au. Sa faapea foi ona ia lapataia le ‘au taalo ia faamalolosi ma finau e faigata le tapuaiga a mātua ma aiga aemaise lava le malo ma le atunuu atoa.
Sa faasolo loa faafiafiaga o le po i le siva Samoa na sausaunoa ai le Miss Pasefika ia Latafale Auvaa faapea ma le sausaunoaga a le ‘au malaga, ae na taualuga e le Taitaifono ma le Mafutaga a Faifeau ma le Ofisa o le Komesina Sili, ina ua mae‘a le taumafataga matagofie ma le felanulanuai i lea afiafi.
O le fofoga o le polokalame amata na feagai lea ma le susuga ia Rev. Perema Leasi o le failautusi o le Mafutaga, ona faasolo ai loa lea o le isi ‘afa o le po i faafiafiaga ma le faatalanoaina e le susuga ia Rev. Tavita Filemoni, o le faiaogaulu o le ‘au le afioga i le Gafatasi, Fuimaono Titimaea Tafua faapea le faiaoga lagolago ma o le taitai malaga foi lea, le afioga ia Galumalemana Rudolf Moors.
Sa matagofie le faatasiga ona sa auai foi ma le Pulenuu o Porirua ia Nick Leggett ma lona faletua, o le tamaitai Samoa foi.
E lei faaletonu foi le tapenaga a le autalavou a le Susuga i le Toeaina ia Aufaga Faafia ma le EFKS i Cannons Creek i tapenaga o pesepesega mālie a Solomona Sekuini Esera ma nai ona tuafāfine ia Jane, Safune ma Sina Esera faapea ma faaevagelia saunia lelei a le Autalavou mo le faafiafiaina o le aofia i lea po.
E lei alo tamala foi le Mafutaga a Faifeau ma le Ofisa o le Komesina Sili i le saunia o meaalofa tupe mo le ‘au ma le pulega a le ‘au.
Na ta‘ape le aofia ma le agaga faamalo i nai tama taaalo e ui lava ina ua mae‘a le taamilosaga e lei maua se tulaga lelei, ae faafetai ua mae‘a manuia e leai se tama na lavea.
Manatua foi e oso a‘e pea le la ma toe fuafua mo isi tausaga o lumanai. Ua toe alo atu nei i Las Vegas mo isi taamilosaga ae tatou tapuai pea atonu e maua mai ai se faailoga lelei.
