E lē toe tau faailo le tautua ma le auaunaga a le kamupani a le Digicel i Samoa ma atunuu i fafo, ona ua tele lona sao ma lana faamāmā avega mo tagata lautele, e lē gata i o tatou tagatānuu moni o Samoa ae faapea foi le Pasefika.
Ua maitauina foi le solosolo lelei o lenei auaunaga i ana faapitoa o loo faagasolo lava i masina taitasi. O le tele lava o galuega faatino a le Digicel o loo tautua ai lava nisi o tamalii o alo ma tamafanau o le atunuu, e lē gata i Samoa ae faapea foi i Niu Sila nei.
O le taeao o le Aso Toonai, 31 o Ianuari na faataunuuina ai foi se tasi o semina a lenei lava kamupani i le maota o le komuniti i East Tamaki, o le faalauiloina lea o le isi a latou faapitoa fou o le faatauina o minute e te valaau ai i numera a le Digicel i Samoa.
O lenei polokalame sa nafa lea ma le afioga ia Leaupepe Tala‘i Lene o le sui o le ofisa tutotonu i Samoa na malaga faapitoa mai e faatino lenei semina mo tatou tagata o loo aumau i Niu Sila nei faatasi ai ma le susuga ia Anthony Faumuina o ia o loo pulea le kamupani o le Digicel i Niu Sila.
Na amata le faatalatalanoaina o le mamalu o le atunuu i le 5 i le taeao ae mae‘a i le 12 i le aoauli. O le faaalia o le fiafia o tagata Samoa i lenei foi tautua na vaaia ai le lē faavaivai o le toatele o le mamalu o le atunuu i timuga o lea taeao ae agai atu lava ma apogi lenei faamoemoe tāua.
Na faatalatalanoa tagata i le faapitoa fou lenei, “E faatau au call Samoa e 10 i le $10 e te talanoa ai i lou aiga i Samoa i le 30 minute i le aso mo aso e lua, i le na o le telefoni a le Digicel e te faaaogāina e aunoa ma lou faaaogāina o isi telefoni, ae afai e te faatauina call Samoa e 20 i le $20 e te talanoa i Samoa i le 30 minute i le aso i aso e 7, ae a 50 call Samoa i le $50 e te valaau i le 90 minute i le aso i aso e 7.
O le toatele o le atunuu na sui a latou sim card ona o le naunau lava ia faaaogā lenei avanoa tāua e fesootai atu ai i o latou aiga i Samoa.
Ae na faaalia e le afioga ia Leaupepe Tala‘i Lene, e fai si taugata pe a e faaaogāina le faapitoa lenei a le Digicel mo isi telefoni, e pei o le Blue Sky ma le telefoni fale ae se‘i vaganā ai lava telefoni a le Digicel i Samoa ona umi lea ona e talanoa.
Na galulue faatasi le Digicel ma le KlickEx i lea aso i le faatinoina o le faapitoa a lea kamupani.
O le Aso Sa ma le Aso Gafua o le a faia ai le faalauiloa mo Hastings ma Napier, Aso Lua o Palmerston North ma Levin, Aso Lulu o Christchurch, Aso Tofi o Nelson ae faaiu i Ueligitone i le Aso Faraile ma le Aso Toonai, ona toe taliu mai lea i Aukilani i le Aso Sa.
