E tolu moliaga mamafa o le gaoi ua tuua‘ia ai e le malo se tamaitai sa galue i le faletupe o le ANZ Guam Inc i Amerika Samoa, e mafua mai i le faalavelave lea na masalomia ai o ia i lona tala faagaoi o ni siaki se lua sa teu atu i le faletupe o le ANZ i le masina o Mati 2014.
O le mataupu lenei na tofu atu i le Ofisa o Leoleo i Fagatogo, ina ua faila e le Taitai o le Vaega a le ‘Operation Risk and Assurance’ a le ANZ se tagi, faasaga i le tamaitai sa galue i le ANZ o Aialani Foster, i lona tala faagaoi o ni siaki se lua sa teu atu i le faleutpe.
E tusa ai ma faamaumauga a le faamasinoga o loo ta‘ua ai, o le aso 22 Mati 2014 na tofia ai e le Taitai o le vaega suesue a le ANZ sui o lana vaega, e faaautu la latou suesuega e tusa ai o lenei mataupu ia Foster, ona o ia tonu lea sa tofia e galue i le taimi na teu atu ai siaki e pei ona fesiligia.
O Foster e pei ona ta‘ua i faamaumauga a le faamasinoga, sa avea o se Tali Tupe i le Faletupe o le ANZ, o ia foi lea o loo maua i faamaumauga a le faletupe, sa ia talaina siaki e lua o loo fesiligia e aunoa ma se faatagaga, ina ua teu atu i totonu o se teugatupe sa faia i le po (night deposit).
Na toe totogi e le faletupe o le ANZ tupe mo siaki e lua na aafia i lenei mataupu, e pei ona ta‘ua i faamaumauga a le faamasinoga. O le siaki #085633 mai le ASCC Financial Aid Pell Grant e $915.35 le aofai, na tala e se tagata i le maketi i Fagatogo mo sana faatau, ma teu ai loa i totonu o le teugatupe a le faleoloa lea i le ANZ i se taimi o le po o le aso 25 Fepuari 2014.
Ae i le aso na sosoo ai, Fepuari 26, 2014, na tala ai e Foster le siaki lea e ala i lona faaaogāina o lana pine faigaluega #2033.
I le po o le aso 17 Mati 2014, na tofia ai Foster na te faamaopoopoina teugatupe mo le po, ma ia tuuina ai i ana faamaumauga le teu i totonu o le siaki #189244 e $891.00 mai le teugatupe o le Litaea a Amerika Samoa.
I se taimi o le aso lava lea e pei ona ta‘ua i faamaumauga a le faamasinoga, na tala ai e Foster le siaki lava lea i le aofai e $891.00, e ala i lona faaaogāina o lana pine faigaluega #2033. O moliaga faasaga ia Foster e aofia ai moliaga mamafa e lua o le gaoi, atoa ai ma le moliaga mamafa e tasi o lona ave faagaoi lea o ni oloa sa tuuina atu i lalo o lana vaavaaiga, ma o ia uma moliaga, o ni solitulafono o le vaega C o solitulafono mamafa, lea e mafai ona faasala ai se tasi i le toese mo le umi e lē silia ma le 7 tausaga, pe faasala foi i le salatupe e lē silia i le $5,000, poo le faasala foi i faasalaga uma ia e lua.
E $10,000 le vaega tupe lea ua faatulaga e le faamasinoga e totogi ona faatoa mafai lea ona tatala lē ua molia i tua mai le toese i Tafuna, e faatali ai taualumaga o lana mataupu.
O ni isi o tuutuuga e usitai i ai pe a tatala i tua, o le faasā lea ona ia toe taumafai e faafesootai le pulega o le faletupe a le ANZ poo isi foi molimau e tusa ai o lenei mataupu, faasā ona ia toe soli se tulafono, a ia avea pea o ia ma tagatānuu lelei e tausi ma tausisi i tulafono a le malo.
Toe lomia i le faatagaga a le SamoaNews
