Soo se faigamalaga lava a o lei tetee le sā o le a folau, e ao ona siaki vaega uma ma fesiligia le auvaa poo lava sauni, e oo foi i se vaalele e tatau lava ona faaailoa tulaga e ao ona nofo silafia ma manaomia ma faamalamalama ina ia saogalemu ma solosolo lelei le faigamalaga. E faapea foi i tiute ma faiva e lē gata o le itu i le tino ae sili ai le galuega a le Atua.
Na faagasolo le semina faapitoa ia Ausetalia atoa e pei ona amataina mai Melepone i le faaiuga o le vaiaso lona lua o Fepuari ae o le avanoa lenei o Bribane ona faasolo atu lea i Sini i le faaiuga o le masina o Fepuari.
O lea lava faamoemoe e toe tapue ai faiaoga mo lenei tausaga auā le alo atu mo le aoaoina o fanau i lenei foi tausaga.
Komiti o Aoga Aso Sa i Ausetalia; Taitai – Fofoga Tupai (Sydney); Failautusi –Ferdinand Jahnke (Brisbane); Teutupe – Chico Sheck (Melbourne); Sui o le Komiti na malaga mai – Ps Saupo Fa‘inifo (Sydney); Taito Mauga (Sydney).
O i latou sa tautalagia le feau auā le tapenaina o le galuega faa-Aoga Aso Sa i le Aso Toonai o Saupo Fa‘inifo ma Chico Sheck. O le taitai na faafoeina lava nisi polokalame, le susuga ia Fofoga Tupai.
O le Aso Sa na fai sauniga ai faifeau na malaga mai i aulotu a Brisbane a o lei toe taliu atu i aiga ma Ekalesia o faatali mai. Momoli le agaga faafetai tele i le Aao tusitusi ia Ps Manuula Nai mo le auina mai o tatou ripoti auā le silafia e le atunuu lautele.
