“Ua molia le alii faitaotoga i le faaoomanu‘a”…Leoleo
O lē o loo suesueina o se tasi mai le nuu o Sataoa e pei ona faailoa mai e se tausi soifua e galue i le falemai faaitumalo i Poutasi Falealili, lea na toe iu i ai fanau mo togafitiga.
O le Aso Tofi, aso 9 o Fepuari 2012 na faia ai taotoga e lē o loo tuuaia sa faaaogā ai se matatafi ma‘ai e pei ona faaalia e le tausi soifua. Na faia uma e aunoa ma ni vailaau ma isi vaega e masani ona faaaogā i ni taotoga mo fanau tama.
O le vaveao o le Aso Faraile na sosoo ma le Aso Tofi na faia ai taotoga o le fanau, na faanatinati atu ai se tasi o tamaititi i le falemai i Poutasi ina ua tigaina.
Faaalia e le tausi soifua, e taunuu atu le tamaitiiti muamua lea, ua fufula lona manu‘a ma ua tigaina i le tiga.
O le taeao o le aso lava lea na taunuu atu ai isi tamaiti e toafitu, ma o le mafuaaga lea na faato‘ā silafia ai e fomai ma tausi soifua le mea na tupu ina ua faamatala e mātua o tamaiti le tipiga a le alii matua.
O le nuu o Saleilua i Falealili sa faia ai lea galuega ma e faapea sa tapa ai le ta‘i $30 tala mo le totogi o le tamaitiiti e toatasi.
O loo faaalia e se tasi o molimau e iai lava tamaiti e lei atoatoa le ta‘i tolusefulu tala ae ua na o se vaega, ae sa faia lava o latou taotoga.
O le alii o loo tuuaia e lē o se fomai (medical doctor) ma e leai foi ni ona tomai a‘oa‘oina i le faia o ni taotoga faapea.
O le molimau ua maua e faapea e lē o se taimi muamua lea ua faia ai ni taotoga o fanau tama laiti e lea tagata, ma ua mapuna mai ia molimau ina ua aliali le faaletonu i fanau na faia i ai le galuega a lea alii fia fomai tipitipi.
E pei ona silafia o le faaiuga o le tausaga i taimi o le tuuaga umi e masani ona ave ai fanau tama laiti mo ia taotoga. A lē o le falemai, o fale o komiti faalesoifua maloloina a tina o nuu ma afioaga sa masani ona agai i ai taotoga faapea mo fanau a se nuu.
O aso ua alu o le fala ninii ma se moa e taoto ai se alii talavou, ae o aso nei o le tupe lava ua totogi.
Faaalia e le afioga i le Komesina lagolago o ia o le sooupu a le Matagaluega o Leoleo, o loo faia suesuega ona iloa ai lea o le tulaga o le a taoto mai ai ni moliaga faasolitulafono.
