E uma le ‘afa muamua o le taaloga a le talita a Laulii ma le ‘au malosi a le Apia Maroons i leAso Toonai muamua o le taamilosaga a le Aukilani Samoa o loo tau’ai le Apia Maroons i le 16 ‘ai i le leai a Laulii.
O Laulii o loo latou umia le talita o le taamilosaga mai le tausaga ua mavae, a’o lea sa lu’iina e Apia. O le toatele o lagona o tagata matamata i lea taimi ua maluelue le talita, pe a faatusa atu i le osofai a Apia i le ‘afa muamua o le taaloga. I le ‘au tapuai a Apia ua to’a lelei le tai ma ua leai se gase pau le galuega a tama taaalo ma le faiaoga o le toe faato’ato’a o le ‘afa lona lua ina ia aua ne’i toe maua se avanoa o Laulii.
I le malologa o le taaloga e lei malolo ai le susuga i le faiaoga o le ‘au a Laulii ia Tagaloaalii i le toe taumafai atu e tulei tama taaalo e faatino le game plan lea sa koleni mai ai le ‘au i le lua vaiaso, auā o lona talitonuga i lea taimi e lei minoi galuega ia sa taumafai atu ai e a’oa’oina ina ia mafai ona tumau pea le talita mo Laulii, aemaise ai ua popole lona loto i le mea ua tulai mai i le ‘afa muamua o le taaloga.
Peitai na avea le faaletonu na tulai mai i le ‘afa muamua, ma auala na toe malosi ai le leo o le faiaoga i lana ‘au ma faasoa loa iai ua tatau ona sui le isi auala e faatino ai le ‘afa lona lua.
O le usitai ma le faalogo e maua le mea lelei, na teu fatu e tama taaalo lea fautuaga mai le faiaoga ma le pulega o le ‘au, ina ua toe faaauauina le ‘afa lona lua.
O le osofaiga muamua a Laulii i le ‘afa mulimuli o le taaloga na faatinoina ai loa vaega ia sa talanoa atu ai le faiaoga, ma o lea sa maua ai loa le latou uluai sikoa faatasi ai ma le manuia o le kiki i le pou ma tulai mai ai ‘ai o le taaloga 7 Laulii i le 16 a Apia.
Na malosi pea le osofai a Laulii ma sa taumafai atu foi Apia e puipui le osofai mai a le Liona ina ia aua ne’i toe iai se ‘ai, peitai e lei foi ai lava tama o le Liona ma sa toe maua ai le isi a latou sikoa ma manuia foi le kiki i le pou ma suia ai ‘ai o le taaloga i le 14 Laulii i le 16 Apia Maroons.
Na toe maua le sala mo Apia i le ‘afa lona lua, ma sa kikiina i le pou ma maua ai isi ‘ai faaopoopo mo Apia i le 19 i le 14 a Laulii. I lagona lava o tagata matamata i lea taimi, ua manumalo Apia, auā e le o toe tele se taimi o totoe.
Na faato’ato’a lava e Laulii le taaloga ma sa toe maua ai le isi ana sikoa faaopoopo ma suia ai ‘ai o le taaloga i le 21 i le 19 a Apia, ae ua toe suia ai foi ma lagona o tagata maimoa i lea taimi. Na malosi le osofai a Laulii ma toe maua le isi ana sikoa e lua ma manuia uma foi kiki i le pou ma see mai ai ‘ai o le taaloga Laulii 33 Apia 19, ma ua toe siilima lua nei foi e Laulii le talita i le vaiaso muamua o le taamilosaga o le Aukilani Samoa.
O le susuga ia Tagaloaalii Sipia o se alo lava o le afioaga o Laulii ua leva foi ona faiaoga i aulakapi i totonu o Laulii o lea ua malaga mai i Niu Sila nei mo se manuia o lona aiga, o lea ua faiaogaina le ‘au i le taimi nei.
O lona taimi muamua lenei ua ia tauaveina ai lea tofiga faiaoga i totonu o le ‘au, ma ua ia taumafai lava i le lelei atoatoa e tumau ai pea le talita i lenei tausaga mo Laulii. Ua avea foi lana uluai taaloga lenei ua vaavaai ai e isi nisi vaega e ao ona toe faaleleia i totonu o le ‘au e tapena ai mo isi taaloga o le Aukilani Samoa o loo fotuai mai.
Iuga o taaloga – Aukilani Samoa
Pool A
Saleimoa 15 – 12 Nofoalii Salevao
Seki Works Mt Fort 29 – 19 Iva
Tama o le Moatoga 45 – 27 Tama o le Lava
Laulii Lion 33 – 19 Apia Maroons
Pool B
Nations 20 – 14 Marist OB
Tama o le Mau Vaimoso 25 – 19 Aucklands Reds
United Brothers 19 – 14 Lotosoa
Laumua o Tumua 43 – 6 Faleula
