E moni e ta’uta’ua Samoa i le lalolagi i le taaloga o le lakapi peitai e na’o le itupa lava o alii e iai le Manu Samoa e iloa ai le igoa o Samoa e le lalolagi, ae e le toatele nisi e talanoa i le au lakapi a tamaitai le Manu Sina. Poo ai foi se tamaitai Samoa e lelei lana taalo lakapi e leai foi nisi se toatele e ave iai se vaai, o nisi nei o vaega e faaono suia ise taimi lata mai pe afai ae sologa lelei le toe fafagu mai ai o le taaloga lakapi i le atunuu mo le itupa o tamaitai.
O le Aso Toonai na tea nei na amata faagasolo ai le uluai taamilosaga taitoafitu mo le vaega o tamaitai, ma o se tasi o tamaitai talavou na tele ina mataina lana taalo i lea taamilosaga, na faapaleina foi ma teine taalo o le taitoafitu lenei, o Saelua Seleti, 20 tausaga le matua mai le Afioaga o Salamumu ma Saasaai. E le gata ina faapaleina ma teine taalo ae na faatulaga mai foi i le sikoa silia, toe ‘ai silia. Faatusaina e le toatele na maimoa i lea aso Seleti, e pei o se taalo a se alii o le taitoafitu a le Manu Samoa, e le gata i le saoasaoa, lelei le pue toe leai se fefe i le faatinoina o le taaloga.
I se faatalanoaga ma Seleti na ia taua ai, ao laititi mai i le faatoa 15 o ona tausaga, na fiafia lava i le taaloga lenei o le lakapi, e na’o ia lava foi le teine e filofilo ai i lakapi a tama o le nuu, o le masina o Aokuso o le tausaga na tea nei, na manatu ai ua tatau ona saili se kalapu lakapi e taalo ai peitai na faigata ona sa leai se kalapu lakapi lelei mo tamaitai, na agai sa’o lava Seleti i le ofisa o le Iuni Lakapi a Samoa ma fesiligia ai mo sona avanoa e mafai ona taalo lakapi ai, na fautua iai le sui o le Iuni Lakapi ia Avii Faalupega ina ia auai ai i le kalapu lakapi a le Afioaga o Apia i le itupa o tamaitai.
O le masina lenei ua faatoa atoa iai le tasi le tausaga talu ona taalo lakapi lea tamaitai i totonu o kalapu. O le miti a Saelua i le tausaga na tea nei, o le mafai lea ona ia ausia ai le auai ai i totonu o le au koleni poo le squad a le Manu Sina, ma na taunuu lava lea miti e ui e lei filifilia ai mo le oceania i le 2017. O lana miti o iai nei mo lenei tausaga, o le fia filifilia ai i totonu o le Manu Sina mo le taamilosaga a le Oceania.
Ta’ua e Saelua Seleti, afai e mafai ona faatino e le itupa o alii lenei taaloga e iai foi lona talitonuga e mafaia foi e tamaitai, pe a tuu uma iai le loto ma le malosi atoatoa, ma toaga foi e koleni e pei foi ona iai le vaega o alii. Na naunau Seleti e fia taalo ai i le tulaga o le ‘afa, ona e masani ona ia matamata ai i le taimi o taalo le ‘afa lauiloa a le Olopeleki a Niu Sila le susuga ia Piri Weepu, peitai ina ua ofi ai i le tulaga o kalapu o iai nei ma maua ai lona avanoa e taalo ai i le tulaga o le first five eight, lea ua autilotilo ai Saelua Seleti e fia avea ai o ia ma tagata taalo lakapi e pei o le taalo a le kapeteni a le aulakapi liki a le Warriors a Niu Sila, le susuga Shaun Johnson. O le miti a lea tamaitai talavou i le lumanai, ia mafai ona filifilia o ia i le Manu Sina ma tausinio ai i nisi o taamilosaga tetele a le lalolagi aemaise lava i le lakapi taitoafitu.
Faamaonia mai foi e le Iuni Lakapi a le atunuu, o le susuga ia Saelua Seleti o loo numera tasi nei i le faatulagaina o teine taaalo lakapi i totonu lava ia o Samoa, ma e le taumate e tele foi lona lumanai manuia i le lakapi e pei ona molimauina ai i le taamilosaga muamua i le Aso Toonai na tea nei.
E tolu vaiaso o le a faagasolo ai le taamilosaga taitoafitu lenei a le Iuni Lakapi mo le itupa o tamaitai ona faatoa sosoo loa lea ma le taamilosaga taitoafitu mo le itupa o alii, ae faaiu ai i le taitoafitu mo aoga lea e aofia ai aoga laiti ma kolisi maualuluga.
