Leai se tali a le Wallaroos i le malosi o le Black Ferns

Fulupeki a le Wallaroos Mahalia Murphy - Photo: Rugby.com.au Stuart Walmsley
Fulupeki a le Wallaroos Mahalia Murphy – Photo: Rugby.com.au Stuart Walmsley

O le Black Ferns na amataina manuia mo Niu Sila i le po o le Aso Toonai i le ANZ Stadium i Sini i lana manumalo 31-11 i le Wallaroos. O le lineout lava a le Ferns o le faavae lea o le malosi o le Ferns, aemaise ai o iina na auala mai ai sikoa e tolu a le kapeteni Seiuli Fiaoo Faamausili.

O le sikoa muamua a le Ferns na maua mai le vave o le siva a le tamaitai o Renee Wickcliffe (14) latalata i le laina. Na pa’u ai ma le laufali i le tamoega lea ae o le ‘afa o Kendra Cocksedge na mauaina le pasi mulimuli mai ia Wickcliffe ma sikoa ai.

O le sikoa na sosoo ai o le sikoa muamua foi lea a Seiuli. O le lineout a Niu Sila latalata i le laina a Ausetalia.

Na matuai mausali le molo a le Ferns ae o Seiuli na tuleia le molo mai tua ma uu e ia le polo, vaaia e ia ma le avanoa i le va o le molo ma le fu’a tulimanu. E lei toe faatali ae na tamoe ma sikoa ai i autafa o le malae i le minute 28 o le taaloga.

Sa tatau ona uma ai iina ma le ‘afa muamua i le sikoa lea, aua e ta le logo o 12-3.  Ae na faatamoe e le Ferns le polo ma sikoa ai Aldora Itunu i lalo o le pou ae ua lua minute talu ona uma le afa, sikoa Ferns 19-3.

O le sikoa muamua a le Ferns i le ‘afa lona lua o le sikoa lona lua lea a Seiuli. O le lineout foi le aupega na faaaogaina. Mai le lima mita na faatulaga atu ai e Niu Sila lana molo, na matua leai ma se tali a Ausetalia i le molo a Niu Sila, mai tua o le molo na tauave ai e Seiuli le polo ma faapa’u ai i luga o le laina sikoa a ua 60 minute o le taaloga.

E lei  umi ae togi le lineout i le isi itu o le malae lima mita mai le laina. O le tulaga lava e tasi le taofiofi e Seiuli o le polo i tua o le molo, ma tulei ai e le foueti le molo agai i laina ma faatolu ai ona sao Seiuli ma sikoa ai.

Ae na tali e Ausetalia sikoa ia a Niu Sila i le sikoa e tasi i le minute 72 o le taaloga. Manaia tele le faatamoeina o le polo lea. O le osofaiga na tauave a Hana Ngaha o Queensland ma faasoa atu ai le polo i autafa, ae toe pasi mai i totonu ma maua ai e Alisha Hewett ma sikoa ai Ausetalia.

E toatele tamaitai Samoa na taaalo i le taaloga faapitoa, o kapeteni uma e lua o Liz Patu mo Ausetalia ma Seiuli Fiaoo Faamausili mo le Black Ferns. O isi o Atasi Lafai, Melissa Fatu ma Alice Tonumaivao mo le Wallaroos. Mo le Ferns na taalo mai ai Idora Itunu, Alena Saili, Leilani Perese, Linda Itunu, Kristina Sue ma Jackie Patea-Fereti.

O le a faatali poo le a le tali a le Wallaroos i le taaloga lona lua i Eden Park i le Aso Toonai. O le manatu o le faiaoga a Niu Sila, Glenn Moore e atili faaopoopo le lelei o le Ferns. Ae fai mai le faiaoga a Ausetalia Dwayne Nestor, o le a faapena foi Ausetalia.

Australia 11 (Alisha Hewett try; Emily Robinson 2 pen)

New Zealand 31 (Kendra Cocksedge, Fiaoo Faamausili 3, Aldora Itunu tries; Cocksedge 3 con). HT: 19-3