“Aua le palaai e teuteu le Faavae” …Tuilaepa
Na amata mai i le taunuuga o le faiga palota o le 1991 ona umia e le HRPP le lua vae tolu o nofoa e 49 o le Palemene ae o loo faaauau pea ona latou umia i le 36 nofoa na manumalo ai mai le faiga palota sa alo i ai le atunuu i le Aso Faraile, 4 o Mati 2011.
O se isi matati‘a ausia gata ae ua toe faapaleina ai le vaega faaupufai ua silia i le 29 tausaga o tu i le foe i le pulea o le atunuu.
E tāua tele i le taitai, Susuga Tuilaepa Lupesoliai Sailele Malielegaoi, le toe maua e lana vaega o le lua vae tolu, e pei ona ia tolaulau nisi o mafuaaga i le feiloaiga ma tusitala i le taeao o le Aso Toonai, 5 o Mati 2011, i le faato‘ā mae‘a o le palota.
“O le a avatu se faataitaiga, o le mea lea o le tulafono o le femoumouai. E taofia ai le femoumouai o le sui (faipule).
O le mea lena sa tele ina faaletonu ai faigamalo i aso ua tuanai ma tulai mai ai Malo lē maopoopo ona o le tulaga faigofie ona feutagai o sui o le itumalo ma faapea atu, o le a ou alu i le pati lea, ae na ona uma mai a o le faaiuga a le itumalo sau loa sola i le isi itu.
O le tulaga la lena lea e fai ma to‘a i le tele o upufai o Malo e masani ona vevesi ai Malo ma lē faia ai ni galuega e atina‘e lelei ai tagata, ae ua mua ona alu le taimi o faipule i auala e tutumau ai pea i faigamalo”.
Le mea lena sa tupu i Samoa i le 1982 ma le 1987 i le faigofie o le feoai o faipule”.
Faaalia e le Palemia sa lē mafai ona faia se gaioiga e taofia ai le femoumouai ona sa ta mau i lalo o le Faavae le saolotoga o le tagata e mafai ona alu ese ai ma faatu lana vaega. Peitai ua mafai ona teuteu le tulafono ma taofia ai lea tulaga.
“E mafai a ona e alu ese ma se vaega ae pau le aiaiga lea ua fafa atu ia te oe, o le faagafua loa o le nofoa ae toe alu i tua e fesiligia tagata na palotaina oe, e toe faia se filifiliga ona o oe lea ua fia alu i le isi pati”, na saunoa ai Tuilaepa.
O le umia e se vaega faaupufai o le lua vae tolu o se popolega lea i le Tautua Samoa e pei ona sa faaleo e se tasi o ona sui tauva ua manuia i le palota, sa avea ma faamasino le tofa Lefau Harry Schuster.
O le talitonuga o Lefau o le mafuaaga lea na tauva ai i le tofi faipule ona ua silasila atu, ua faia e le HRPP teuteuga i le Faavae ua oia ai le saolotoga e filifili saoloto ai faipule i le vaega faaupufai e fia auai.
Sa taumafai le Tautua Samoa e fia maua le numera 17 o nofoa e taofia ai le lua vae tolu e toe maua e le HRPP ina ia taofia ai le faia o teuteuga e lē talafeagai, peitai e 13 nofoa ua manumalo ai ma ua toe umia ai e le HRPP le lua vae tolu.
Na faaalia e le Palemia, o se isi o teuteuga tāua ia te ia na faia i le Faavae a o umia foi e le HRPP le lua vae tolu o nofoa e 49 i se tasi o paeaiga ua mavae a le Palemene, o le aloaia lea faaletulafono o le tofiga Sui Palemia.
Faaalia e Tuilaepa o paeaiga i tua atu sa tofia ai Sui Palemia o ni mea faaulaula auā e lei teuteuina le Faavae e aloaia ai faaletulafono. O le taimi nei ua aloaia le tofi Sui Palemia.
