Na lagona le tuu mumusu a le toatele o tagata i lea aso, ‘e pito sili lava ona popular le nuu a Samoa i le faaaliga atoa.’
O le mea moni, e lē o se tala na tau ina avane ai, auā o le molimau foi lena a le tusitala ina ua taunuu ma matauina le vaaiga atoa i lea aso.
E moni sa matagofie ma aulelei tapenaga a fata uma sa faatulaga ai faafiafiaga a atumotu eseese, sa iai foi tagata na maimoaina, ae na iloga le eseesega pe oo mai i totonu o le nuu o Samoa, lea sa matuā tumutumu i ai tagata e maimoaina faafiafiaga na faia i le fata o a latou faafiafiaga, lea sa faaogatotonu i ai le nuu o Samoa.
E lē o se uluai taimi lenei ua faia ai nei faaaliga a le Pasefika mo totonu lava ia o Aukilani.
Peitai e lē o iai se vaaiga faapea ua tau mou atu le taulia, ae ua iai i se tulaga sili ona matagofie.
O se faailoga o le laalaa pea i luma o le lelei ma le maopoopo o le faatinoga o polokalame a i latou o loo nafa foi ma lenei faamoemoe.
Mo le fata lava ia a Samoa, e lasi ma mataina faafiafiaga sa faatino ai.
O aufaipese tetele, aufaipese toalaiti, o ausiva i soo se taga, mai lava i suifeiloi faaneionapo, le siva ailao naifi a le alii faafiafia iloga i lea foi taleni, o Lenni Ropati Mamea ma nai ona alo, ae salani ai loa le aso e le ausiva ua a‘ea‘e mai lo latou lauiloa i lenei foi talutalufou o faafiafiaga faa-Samoa, le “La o Samoa”.
Na matauina le silamiō o le faitau selau ma selau o tagata sa maimoaina faafiafiaga faa-Samoa, ma le tele o meapueata na taufai emo atu a o fegauiai mai tino vavai o tamaitai lalelei o le La o Samoa.
E pei ona silafia, o le ausiva lenei o loo faauluulu i le faletua ia Sia Su‘a, lea ua avea o se ausiva ua iloga ai le ta‘u o le ausiva Samoa i totonu o Niu Sila nei.
E mālie eseese lava lea aso, auā e foliga ua mua ona alu le mafaufau o si tasi alii palagi e tau fetuunai solo faamalama eseese o lana meapueata, ai sa fia maua lelei se ata atoa o le tamaitai autū o le ausiva, o Lana lea sa tele ina pito mai i luma, ae ua avea ma itu ua lāvea ai si alii pueata i ato a le aumaimoa, ma patatū faafuasei ifo ai i lalo.
E ui i lea, sa to‘a lava le tai ma fesoasoani ane nisi taulelea e faatu i luga si alii pueata, e ui foi ina maona i luga le ata faamaela a se tina Samoa, ia ae o aga lava ia o aso faapenei.
Ese foi le ola ma le mataalia o le alii sa avea ma fofoga o le fata a Samoa, e lē gata i lona siufofoga, ae o ana ia foi taga sa fai ma tovā ai faafiafiaga.
Na maua foi le avanoa e faalauiloa mai ai luga le faatasi ai o le alo lauiloa o Samoa, le Afioga Tooletai David Tua, aemaise o lana fusuaga o le a alo atu i ai i le faaiuga o le vaiaso nei.
Sa faalauiloa mai ai foi ma le Afioga Tuigamala Vaaiga Tuigamala, o ia o le faaulu o le pulega mo David Tua, ae o se alo foi ua lauiloa ai Samoa i le lalolagi i le taleni o le lakapi.
O vaaiga matagofie foi i le felanulanuai ma le ofoofogia o nisi o meataulima Samoa sa faatauina i tamai faleie eseese sa faatulaga i totonu lava o le nuu o Samoa, ma o le matau a le tusitala, e iai foi nisi o le au faipisinisi mai lo tatou atunuu o Samoa, na autovaa mamao mai lava ina ia faalauiloa a latou oloa i lea aso, auā o se taimi lelei foi mo faatauga.
Na faaiu le maimoaga i le see mai loa i le itu sa taualuga i ai tapenaga o lena vaiaso atoa, o faleaiga i soo se taumafa.
E ui lava na tau tomumu laititi le tusitala i le faale ogatasi o lana $10 tala ma le telē o lana ipu na maua ai, ae na lotomalie, auā o le size lava ia o meaai i aso tumutumu faapenei.
Sa sologa lelei mea uma, mataalia foi galuega a nai alii ma tamaitai leoleo, tainane le anoano o i latou sa galulue fita e lagolago i le leoina o le aai atoa sa faaaogā mo nei faaaliga, ma fesoasoani mai i tagata maimoa e faafaigofie mo i latou soo se faamatalaga i vaega eseese sa faatulaga ai nuu poo fata a atumotu eseese o le Pasefika.
