Na matuai uigaese le faatumulia o le malumalu ekalesia Katoliko i Lilac Inala i le Aso Toonai ua tuanai i le toatele o aiga, uo ma ē masani sa molimauina le tuufaatasia o le tamaitai o Janet ma le susuga ia Peter Ta‘elevai.
O le tau totogo lenei o aiga fou e osia feagaiga i Kuiniselani e pei foi ona maitauina i le faagasologa o tala o le lotoifale ma vaega o loo tutupu i totonu o faalapotopotoga a Samoa i lenei itu o le kelope.
O le tamaitai faaipoipo o ona tuaa o Pipi Fonoiā Viliamu Tiatia mai Salelologa, ma si ona tinā o Pepe mai le alalafaga o Siumu. O le susuga ia Peter o le alii faaipoipo, o nai ona mātua o Tugamau Ta‘elevai mai Tufulele ma si ona tina o Fesulua‘i Ta‘elevai mai Satupaitea.
O le taitai o le sauniga o le susuga i le faafeagaiga ia Joshua Asafo Avia, o le taitai o le Ekalesia Hosana a Brisbane ma Niu Sila.
Sa avea le susuga i le faafeagaiga taulagi ia Faamanuia e apoapoai i se feau faalaeiau auā le aiga fou.
Sa tulai le susuga ia Esa Taitai e fai ma pule o le tausamaaga.
O le itu tau faaaloaloga sa nafa lea ma le fetalaiga ia Tuuu Peletisala Nonu Afoa, o le sui o aiga na lua.
Na faia foi le faatau ma le sivaloa e saili ai se tasi e agatonuina le vagana a le fetalaiga ia Tuuu, ma tasi ai i le tofā ma le moe i le fetalaiga ia Tapuala Taumaloto Faalelei, o le tootoo o Maauga ma Nuuausala, le fetalaiga ia Vaili e faaleoina se faafetai i le maualuga o faaaloaloga ma le tausamaaga ua fata ai luga fata foi lalo auā Tumua ma Pule.
Sa maualuga le aso i le tele o malo faaaloalogia ma aiga na malaga mai i Niu Sila ma Samoa e pei o le grandmother o Janet o Itania Nonu Afoa mai Siumu. Faapea le faletua o le faafegaiga AOG mai Faleasiu, Tafaoga Faumuina ma le tuaa o le faafeagaiga mai Niu Sila o Luaipou Avia ma nisi lava malo mai isi setete o Ausetalia nei.
Ia manuia le aiga fou Peter ma Janet Ta‘elevai!
