Ua toe lologo tala i Aotearoa ma le lalolagi atoa i le tausaga nei i le au a tamaitai Samoa i le taaloga o le lakapi liki. Ua fai si leva e lei toe faalogoina se au a tamaitai peitai o lea faatoa toe agiga lea o se au liki a teine Samoa i lenei tausaga e pei ona faaigoaina ai loa o le Fetu Samoa.
O le au o loo filifili mai i alo ma fanau o loo nonofo i totonu o Niu Sila ma Ausetalia ae o latou faasinomaga ma tupuaga e mai i Samoa i Upolu ma Savaii.
O le aoauli o le Aso Tofi na faataunuuina ai se aso faapitoa e feiloai ai le mamalu o le atunuu ma le au a tamaitai le Fetu o Samoa i totonu o le taulaga faatau a Magele.
O se avanoa ua atofaina sei momoli ai faamanuiaga a le atunuu ao alo atu ana tama fanau i le laua taaloga faitaulia ma le Kiwi Ferns le au malosi a tamaitai a Niu Sila i le Aso Toonai e sosoo ai 22 o Iuni, lea e tala malae ai i le taaloga faitaulia a tatou uso mai Tonga le Mate Maa Tonga ma le Kiwi a Niu Sila.
E maeu foi le lagolago ma le titi faitama o matua ia latou fanau, ua tiga lava le louloua o le tau ma le malulu ae ua faamaloulou atu lava nai tina ma tama matutua aemaise o fanau e faailoa lo latou alofa tulai e ala i le auai atu i le faamoemoe o le Fetu Samoa.
O le afioga ia Father Michael Endemann na tatalaina le polokalame i le sauniga lotu ao le susuga ia Papalii Lafulafu Peo na saunoa e faafeiloaia le mamalu o Samoa potopoto ma le au a tamaitai le Fetu Samoa, ae sa vaa seelua ma le susuga i le aoao ia Tavai Meni i le fofogaina foi o polokalame o le aso.
O le tofa ia Tuiavii Freez Solomona sa fai ma sui o le pulega o le au ma le au atoa e momoli le agaga faafetai i le paia ma le mamalu o le atunuu i le tala aao atu ma afifio atu e faaali lo latou lagolago i le au a le atunuu.
O le Fetu Samoa o lea faatoa toe lalaga mai lea o se au a le atunuu mai i le taimi nei, ma ua faasauni le au a tamaitai e auai atu i taaloga o le Pacific Games lea e tali malo ai Samoa ia Iulai i le tausaga nei e tatala lava i taaloga liki i le aso 8 ma le aso 9 taaloga nei i Samoa.
O le tausaga 2021 ua tapena ai foi le au a le Fetu Samoa i le ipu a le lalolagi i taaloga lakapi liki auā o lea ua ausia lea avanoa mo au a tamaitai o le lalolagi i lenei lava taaloga.
E lei tuaa i lalo se loto faafetai o le fanau ua fai ma sui o Samoa i le au a le atunuu e pei ona avea ai le tamaitai ia Masuisuimatamaalii Pauaraisa e faaleo lo latou loto gaafetai ia latou aiga uo ma e masani sa mafuta faatasi atu e tuu atu le latou faamanuiaga ao sauni i le taaloga.
Na sosoo ma le siva Samoa a le ‘au atoa ona faagasolo loa lea o le saini a tamaitai taaalo ma le pulega i ofu ma tusi a fanau ma aiga e pei ona masani ai feiloaiga faapenei ma au taaalo ma le atunuu ma tatala ai loa le filialii i le mamalu o Samoa.
O le maualuga ma le matagofie o le faamoemoe ona sa auai atu iai sui o le local boards a Magele ma Otahuhu faapea ma le au savali a le Walking Samoans tutoatasi a Magele aemaise o nisi kamupani sa latou lagolagoina le ‘au e pei o le G-Mana Wholesale Autos, aemaise ai o le malupuipuia o le faamoemoe i le galuega faifai pea a le mafutaga o le Samoa Atia’e i Magele o loo latou leoleoina ai le taulaga faatau i ni vaega e maua ai le saogalemu.
