Toeaina ia Rev Lance Tautiepa, ona uso ma se vaega o le auaiga ina ua maea toe sauniga o si o latou tina ia Tautali Tuimaugapo Seve Tagopau Niusulu

Ua gausia se tasi o poutu malosi, sa faamalumalu i le aiga, ekalesia ae tainane alalafaga, ma misia e aiga o tagi mai ala. Ua motusia le asoa, ma ua le atoa le faitau ina ua mamae le fugalaau sa fai ma taula’iga o mata o tagata e toatele. 

Na lē masino le anoanoai o tagata na molimauina le soifua o le tina matua ia Tautali Tuimaugapo Seve Tagotau Niusulu. O matagaluega e seulutasi a le Faasinoti faapea ekalesia EFKS ma nisi ekalesia sa solo atu pesepesega e ala i faigalotu, leo ma valevale alofa ona o se tagata sa faasafua lona alofa i soo se tagata a’o soifua mai o ia. 

Na lologo faa-Tutuila le faafofoga a le aofia na faatumulia ai lo la maota i Darra i molimau a tagata eseese, na taufaasaosao i lea afiafi i le fia molimauina o le tele o galuega lelei na faia e lenei tina. E tautala galuega, e faaauau lava e ia galuega alofa le gafa o lenei tina i ana galuega mae’ae’a mo soo se tagata, lea lava na faailoa tino i lea afiafi.

A’o soifua mai lenei tina sa lei faatuaoia lona alofa i le la’uina mai o tagata mai Samoa, o ona aiga, tagata e lē tau i ai pe toto pe tino, e oo lava i ekalesia ma nisi nuu na ia aumaia mai Samoa ona o sailiga manuia.

O nisi e toatele na ia liliuina mai ma ua manuia o latou aiga i nei atunuu, o nisi sa manatua pea a’o nisi na tuu lava i le faitalia. O saafiafiga o le alofa foai ma tausi faifeau, auauna a le Atua, ua faagaganaina uma i lea afiafi. 

Ua moni lava i lenei soatau le upu, “Le Auauna lelei e ma le faamaoni, ulufale maia i le fiafia o lou Alii.” O ni lagona o le misia o se tagata sa auauna ma le faamaoni na saafi i ai le tele o tausi matagaluega na faasoa o latou agaga faagaeetia a’o molimau e tusa ai ma le mafutaga mafanafana ma le tina ia Tuimaugapo. 

O ona toe sauniga sa faataunuuina pea i le malumalu a le ekalesia Hosanna Church, lea sa faatautaia i le ekalesia Metotisi ae faaiu ai i lona oliolisaga tumau i Goodna, lea na taoto ai i le va o le tamā o si ana fanau (nofoaalo) faapea si ona tina. Poo le ā le toatele na lata i le afe tagata, ae na lava tapenaga o taumafa e le Uncle Sam’s Catering. 

O se tagata faimea mafai, loto foa’i ma e loto alofa foi i le aufaigaluega a le Atua ma soo se tagata. 

Ao avea ma Peresetena o le Tuaa Sinasina i Kuiniselani – Tautali Tuimaugapo Seve Tagotau Niusulu

O loo molimauina e le toatele o tagata aemaise le community Samoa i Kuiniselani. O Tautali Tuimaugapo Seve Tagotau Niusulu na ia faavaeina le Mafutaga a le Tuaa Sinasina, o ia foi o se tina e tautala ma savali. E toatele foi nai tamalii ma failauga sa lagolagosua i totonu o lenei mafutaga, ae faapitoa lava i nai tamā ma tina matutua.

O alo o le tina matua e aofia le susuga i le Toeaina o loo avea ma taitai o le Pulega EFKS a Sisifo, Rev Elder Lance, Lana, Daniel, Mark, Allen, Palolo, Taalili, & Ronald. Na faia le tele o molimau a alo ma fanau i le po o le Family Service, o maupaolo ma nofoaalo sa tele lo latou agalelei e faamatagofie toe aso o si o latou tina faapea le lagolago a aiga. 

Na auai le toatele o le faasinoti Ekalesia Metotisi faapea nisi o tausimatagalue mai Setete e aofia ai Rev Laauli Leiataua ma Rev Kueva Tuimauga ona e lē galo le alofa ma le tausi feagaiga o lenei tina.

O ona toe sauniga na molimau le tamā ia Manū Sa’emo i le mafana o le la mafutaga ma si ona faletua. Ua ia matuā misia tele lenei loomatua, i ona uiga alofa i soo se tagata aemaise le tausiga o ia i aso uma. 

E manatua foi e le toatele auā o si ana ‘ote lava lea ua faatofusia ai fanau ma le tele o tagata na ia agalelei i ai i le tele o manuia. 

Na tasi moemoe le nofoaalo e fai ma sui le susuga i le toeaina ia Rev Lance e saunoa i se molimau ma le talaaga o Tautali Tuimaugapo Seve Tagotau Niusulu. Na saafi le toeaina, e lē mafai e auro ma ario ona faatusaina le moni o le alofa faatina lea ua manuia ai fanau, ma a latou fanau faapea aiga. 

E maliu le tina matua ua savalia le 85 tausaga o lona soifua. O Tautali Tuimaugapo Seve Tagotau Niusulu e mai le alalafaga o Falelima, Samata ma Fagafau i le motu tele i Salafai, e moni lava e tele a’a o le tagata.

O lona sogasogā a’o ia faafoeina le Mafutaga a le Tuaa Sinasina, sa fai ma pine faamau se laasaga fou na o latou a’oa’oina, i le faaaogāina o masini computers e pei ona iai le polokalame i le Aso Faraile 12 o Mati i le 2010. O le faamoemoe sa taitaia e si ona alo le faigalotu, le Susuga ia Rev Lance e lagolago si ona tina a’o avea ma Peresetene o le Tuaa Sinasina Samoa Elders Advisory Council Australia. 

O nei taumafaiga uma, e opogi e le toatele sa auai foi malo faaaloalogia e aofia ai le Councilor – Paul Tully, Catherine Sweeney – Tamaitai Pule o le Multicultural Ipswich, Pule o le Centre Link i Goodna. 

A’o faamanatuina le 150 tausaga o le Pasefika i le itumalo o Ipswich i le tausaga e 2010, lea na faatasia ai tagata e ova atu i le tolu afe (3000), na taulamua ai foi lenei tina matua ia Tautali Tuimaugapo Seve Tagotau Niusulu ma lana mafutaga a le Tuaa Sinasina Samoa Elders Advisory Council Inc. 

Na malualii lea taeao auā o le ‘ava o feiloaiga, sa faatinoina uma e le mafutaga a le Tuaa Sinasina. Na faavailolo lava le tele o isi mafutaga a’o alo faiva o tausala e faatino ma ta’utino le solo a le tamaloa i lea faamoemoe.

Tau ina ia alofagia e le Atua faaavanoa se nofoaga mau mo lenei tina aogā o Tautali Tuimaugapo Seve Tagotau Niusulu.