Susuga ia Faipaua Iakopo ma le faili o le Fantastic Band i le tatalaina o lana CD o pese faaleagaga

O le igoa o le CD lotu faaleagaga a le susuga ia Fa’ipa’ua Iakopo o le Aumai lo’u Malosi. O lana CD muamua lea ua mafai ona ia tusia ai ni pese faaleagaga e faaaogāina ai lana taleni pese mo le Atua ma lona finagalo. O le lagona o le alii pese ia Fa’ipaua Iakopo i lenei CD, e tele taimi ua pese ai i pese faalelalolagi ae e alu lava lona mafaufau i pese lotu ona o lana taleni o le meaalofa mai le Atua.

O lona lagona e lē manao e tuufaatasi ni pese lotu ma pese faasalemausau i se CD e tasi, ae e tatau lava ia te ia ona fai ese se CD faapitoa na’o pese faaleagaga e momoli ai lona loto faafetai i le Atua ona o lenei taleni ua foai mai mo ia. Ua tele tausaga ua tautua ai i le musika, ae o mea uma na te faia i lenei lalolagi e taumafai lava ia viia le Atua i mea ua foai mai mo ia ma lona aiga.

Talu ai ona o ia e tele taimi e alu ai i le falemai e vaai le fomai i mai o lona tino, aemaise ai e iai lava ona ia manaoga faapitoa faatasi ai ma le mai ua maua ai i ona fatu gao (tulou) o le tasi lea vaega o loo mamafa i lona mafaufau ua tupu ai se lagona ia te ia e faaaogā tatau loa lana taleni i pese faaleagaga ina ia faamalosia ai se agaga o loo mafatia aemaise o mafatiaga o loo feagai ma ia.

O le auga tonu lea o le pese ua faaigoaina ai lana CD lotu o le “Aumai lo’u Malosi.” O le pese lenei ua leva ona aumai e le Atua i lona mafaufau ma e lei faapea na ia tusia i se api e faamau ai. 

E mau pea upu o le pese i lona mafaufau faapea ma le fati ona ia lagona lea o le pese ua aumai e le Atua mo ia e toe tatalo atu ai i le Atua e aumai sona malosi e faaaogāina ai lana taleni.

E tele foi tagata o loo iai faafitauli a mai o le tino ae e leo manatu foi i latou i le mea e maua mai ai le malosi ae a tonu e aogā nei musika faaleagaga e faamalosiau ai i tagata o le Atua e ou le malosi ma le pule uma lava. E sefulu tasi pese o loo i totonu o le CD lotu, ma o le afiafi o le Aso Toonai sa tatalaina aloaia ai loa lea taumafaiga a le susuga ia Fa’ipa’ua Iakopo i le hall a le ekalesia o le Holy Cross i Papatoetoe. 

Na faatumulia lea faamoemoe e le mamalu o le atunuu aemaise o aiga uo ma e masani sa agai atu ma lagolago le faamoemoe a lenei alo o le atunuu. 

O le susuga ia Kevin Oge sa fai ma fofoga o le po ao le faili a le Fantastic Band sa faafoeina le tele o musika. 

O le susuga ia Fa’ipa’ua Iakopo e mai le afioga o Faleasiu ma Tufulele. O le agaga faafetai o le alii pese i le Atua ona ua faataunuuina ma le manuia lona faamoemoe, aemaise ai o lana faafetai i ona aiga uo ma e masani sa tapuaia ona faiva, faatasi ai ma le loto faafetai i le faili a le Fantastic Band sa latou galulue faatasi i lenei faamoemoe.