Ua mae‘a ona toe tapenaina ma faaleleia nisi o polokalame a le TV Samoa i luga o le alaata a le Triangle TV.
O le toe foi mai o le TV Samoa e faaauau lana tautua mo le mamalu o Samoa i Niu Sila, o se vaega lava o lana ofo ma le tautinoga sa faia muamua mo le tautuaina o le atunuu.
E ui ina sa lei toe vaaia mo sina vaitaimi ona o nisi o faatatauga ma fuafuaga mo le agai pea i luma, peitai sa iai lava le manatu e fia faaauau pea lana auaunaga e pei ona amata mai ai.
O le saunoaga manino lea a le afioga i le tamaitai pule o le TV Samoa, le faletua ia Taufau Gardenia Aukuso.
O le po anapo, aso 10 o Oketopa i le ‘afa o le sefulu, na toe vaaia ai le polokalame Samoa a le TV Samoa i luga o le Triangle TV, e pei ona sa iai muamua.
O le a faaauau ai pea i po o Aso Gafua taitasi i vaiaso uma mo le umi e tolu sefulu minute. O se tasi o vaega sa taulai i ai le silasila a le tamaitai pule ma le pulega a le TV Samoa, ona talu ai o le tele o ata sa pueina, aemaise ai o ata tifaga a le South Seas Picture sa tapueina, o se avanoa tāua tele lea e toe faalauteleina ai mo le maimoa a le atunuu i luga o le televise.
Ae faaopoopo i ai i le tele o tautua a le Video Centre ma le South Seas Pictures, o le tele o faafiafiaga, pese sa tuufaatasia, ma ua avanoa nei mo le silasila a le atunuu.
E lē gata i lea, ae faapea foi manaoga o le atunuu e tuputupu pea i aso uma.
O tala fou mai Samoa, ma talanoaga i mataupu tāua ma le aogā e atina‘e ai aiga, o le a vaaia ma toe silasila i ai i luga o le TV Samoa.
O le saunoaga a Taufau sa ia ta‘ua ai, e lē uma pea le fia auauna ma tautua mo Samoa i soo se auala e mafai ona faia. E lē gata i lea, o se manaoga e tupu pea i aso taitasi, ma e lē mafai e se isi ona taofia pe aveesea, le fia faatumauina pea o le lagona auauna.
O le faaiuga o lana saunoaga sa ia faailoa ai i le Samoa Times, o avanoa uma e maua faatasi ai ma le tatalo ina ia maua le soifua manuia i le atunuu, ma se malosi i le auaunaga a le TV Samoa, e faia ai mea sili mo le atunuu, ae silsili ai le viiga mo le Matai i le Lagi.
