E lei mamao tele atu ona mae‘a le faapaiaina o le malumalu tapuai o le Ekalesia Faapotopotoga a Iesu i New Lynn, ma o se nofoaga matagofie tele ma ua fetaui lelei foi pe a fuafua i le toatele o le aulotu.
E ui foi ina afea ma fetaiai le ekalesia i New Lynn ma le valaau paia a le Atua, na valaau ai i lana auauna le susuga ia Maliumai Atiga sa tausia le galuega, ma tatala ai le mafutaga a o foufou ma loma le faapaiaina o le malumalu, ae sa faatuatua pea, e iai le aso ma le taimi e toe nofoia ai le nofoa o le galuega a le Atua.
O le Aso Toonai na tea nei, aso 8 o Oketopa, na tali ai le manaoga ua leva ona nofo faatali i ai le paia o le ekalesia, ina ua feiloai ma faatalofa i lē ua filifilia e tausia le lafu mamoe.
O se feiloaiga fiafia ma le agaga faafetai ona ua faataunuuina le faamoemoe sa lupe.
Na iu le filifiliga a le aulotu i le susuga ia Ioelu Lafaitele ma le faletua ia Tausaga o se tasi o alii a‘oa‘o sa tautua i le atunuu i Samoa.
O le Aso Toonai na tea nei, aso 8 o Oketopa, sa taunuu ai le faamoemoe o le aulotu i New Lynn, ma osi le la feagaiga, ina ua feiloai ma lē na tusi lima i ai.
O le sauniga i le faapaiaina o le osiga feagaiga sa taitaia lava e le susuga i le toeaina o le Matagaluega, le susuga ia Mose Tuisaula.
O le susuga i le faafeagaiga o le ekalesia i Niutone i Aukilani, Lolagi Mika, sa fofogaina le afioga a le Atua, e faamalosiau ai i le galuega mo itu e lua, le Faifeau ma le aulotu. Sa auai foi le susuga ia Utufua Efaraimo o se tasi foi o Faifeau o le Matagaluega.
Sa maitauina foi le matagofie ma auau tetele lagona ma faalogona o le aso, ina ua afea ma pa‘ū tonu le Upu a le Atua, i le auga ma le faamoemoe o aso faapea.
O se lui tele sa saunoa i ai le susuga i le Failauga, Lolagi Mika e faapea, O le tagata tau poo le fitafita mo le Atua, e lē toe foi ola, pe foi soifua i lona aiga, ae ia iu lona soifua i le galuega a le Atua.
O vaaiga ma aga masani lava foi o aso faapea, sa faaiu i ai le faamoemoe. O le mae‘a ai o le sauniga faapitoa i le malumalu o le Atua, ona sosoo ai lea ma faafiafiaga a le autalavou, auā le auvalaaulia ma aiga e lua sa auai i le molimauina o lea aso tāua.
O le Failautusi lava o le ekalesia, o ia foi o le Fofoga o le Matagaluega, le afioga ia Seuamuli Toma sa nafa ma le faasoasoaina o le polokalame atoa o le aso.
O ia foi sa fai ma sui o le ekalesia i New Lynn, e momoli faaaloaloga i le toeaina o le Matagaluega faapea le aufaigaluega, e talimasineia ai lea afifio ane mo le faatinoina o tiute, aemaise ai o le molimauina o fuafuaga uma.
O le taumafataga sa tapenaina lava e le mamalu o le aulotu, sa tala foi le malo auā se afu o le paia i le aufaigaluega ma ona pelega masani, ae faapea foi aiga ma valaaulia faapitoa.
Sa faaiu ma le manuia lea aso, ona na ogatasi le faatoeaina o Taitai ma le aufaigaluega, faapea ai ma le faatoeaina o saunoaga ma polokalame a le afioga ia Seuamuli Toma, ae salani i le alofa ma le agalelei o le Atua.
