O le aso 30 o Iuni (Niu Sila) e toe foi ai Lupesoliai Laauli Joseph Parker i le maea e faaauau mo le isi ana fusuaga. O le a fetaui ai ma le alii Amerika o Eric Molina.
O le fusuaga ua faaofi i le Undercard a le fusuaga a Demetrius Andrade ma Mciej Sulecki mo le fusi o le Middleweight a le WBO. O lenei fusuaga e faia lea i le Providence i Rhode Island i Amerika. O le taimi muamua lenei ua toe foi ai Parker i le maea talu ai le fusuaga ma Alexander Flores i Kalaiesetete i le masina o Tesema 2018.
O le uluai fusuaga lenei i le feagaiga fou ua sainia e Parker male Matchroom Boxing, latou te vaaia ai fusuaga a Parker. E $10 miliona NZ le aofaiga ua saini ai Parker mo fusuaga e tolu i lalo o le vaaiga a Eddie Hearn. Ae o le a tumau ai David Higgins i le pulega a Parker, faatasi ai ma Kevin Barry e tumau pea o le faiaoga a Parker.
O le toe foi ai o Parker i le maea i lenei taimi vevela o le Paga Mamafa, aemaise ai le manumalo a Andy Ruiz ia Anthony Joshua i le vaiaso ua tea. O se itu lelei tele mo Parker aemaise lona naunautaiga ia toe avea o ia ma siamupini ole lalolagi, ae ao ona manumalo i le la fusuaga ma Molina i le faaiuga o le masina nei.
O Molina o le tagata fusu ua masani i fusuaga tetele. E 32 ana fusuaga faapolofesa e 27 manumalo ae 5 faiaina. O na faiaina e iai fusuaga ma Anthony Joshua (TKO) ma Deontay Wilder (KO).
Ua atoa nei le lua masina o iai Parker i Las Vegas e galulue ma Kevin Barry mo le fusuaga ma Molina. E ui faatoa faailoa le igoa o lana paga i le vaiaso na tea nei, ae ua leva ona tapena Lupesoliai mo le fusuaga. E iai foi le faamoemoe e sosoo le fusuaga lea ma le isi ana fusuaga i le masina o Novema poo Tesema o le tausaga nei, e ui o loo faailoa e Parker ma lana faiaoga lo la faanaunauga, e faataunuu uma ana fusuaga e tolu i lalo o le maliega ma le Matchroom Boxing i le tausaga lenei.
Na ta’ua e Kevin Barry o le taimi muamua lenei ua tausi ai e Parker le olaga faa-polofesa i le taaloga. Ua toleni malosi o ia ese mai ai i taimi ua tea na malolo ai i va o fusuaga. A’o le taimi nei ua saputu toleniga ma tausisia le soifuaga e tatau ai mo se tagata fusu faapolofesa e iai Anthony Joshua ma Wilder.
O se tulaga ua faagaeetia i le faiaoga i lana foi galuega o le tapenaina o Parker mo lenei laasaga o lona taumafai. E le na’o le tasi le fusuaga ae e tolu fusuaga sosoo ua sauni nei iai. O lona uiga e mautinoa le e lua fusuaga a Parker i le 2020 i lalo o le feagaiga fou ma Eddie Hearn. O le lua o na fusuaga o le a faatino i Peretania, le laumua o galuega a le Matchroom Boxing. Afai e taunuu le fusuaga a Anthony Joshua ma Andy Ruiz i le masina o Novema e tele le avanoa e fusu ai Parker i le po lea.
Ua opogi ma talia lelei e le taaloga le feagaiga fou a Parker mo lona lumanai. O le masina o Mati ua tea na faagata ai le feagaiga a Parker ma Duco Events, o le ala lea na tau saili ai e Parker se pulega fou mo lona lumanai. E ui ua saini lima o ia ma Eddie Hearn ae ua taofiofi foi e ia le fesoasoani a Segialii David Higgins e faafoeina le feagaiga fou ma Eddie Hearn ma le Matchroom Boxing.
O leleiga o le feagaiga fou lenei ona e iai fusuaga o le a mafai ona fai i Amerika. Ua faatuina foi le lala foi o le Matchroom Boxing i totonu o Amerika, lea na tatalaina i le uluai fusuaga a Anthony Joshua i Amerika i le vaiaso ua tea.
O kamupani faasalalau tetele a Amerika ma Peretania o le a faasalalauina fusuaga a Parker. O le Sky Sports i Peretania ma DAZN i Amerika. A’o loma le fusuaga ma Molina o loo talanoaina e Higgins se feagaiga faasalalau fou mo Niu Sila ma Samoa, aua o ia feagaiga uma na faamuta i le masina o Mati na tea nei.
