O le seleni lea ua togi e Andy Ruiz ia Eddie Hearn e manao e toe fusu ai ma Anthony Joshua. E 40 miliona pauni le aofaiga o le tupe ua tali ai Ruiz ia Hearn mo le Rematch ma AJ. E ui e manino le feagaiga na sainia e Ruiz mo le fusuaga ma Joshua i New York faasino i le Rematch Clause, ae e lei manino le aofaiga o tupe nai autafa o le Fuaiupu lea. O le ala lea ua pulea ai e Ruiz le tupe e manao ai mo le fusuaga lona lua.
I ripoti mai le Matchroom Boxing ua faamaonia ai o le fusuaga o le a fai i le masina o Novema poo Tesema. E lē o mautinoa poo fea e fai ai le fusuaga. O le manaoga a le pulega e toso atu i le United Kingdom le fusuaga e fai ai auā e fesoasoani tele lea i taumafaiga a Anthony Joshua.
O fusuaga uma na manumalo ai Joshua na fai i le UK, ae o le fusuaga muamua na malaga atu ai i Amerika lea na faia’ina ai ia Ruiz. Peitai, o le manao o Andy Ruiz e ave le fusuaga e fai i Mexico i lona atunuu.
Ae ua maua foi na ripotia ma ta’ua ai e Anthony Joshua lona manao e ao ona toe fai le fusuaga i le Madison Square Garden i New York auā o iina na lusi ai ana fusi ia Andy Ruiz. O le tulaga maualuga i le manatu o le alii fusu, ia toe vave feiloai ma Andy Ruiz ina ne’i te’i ua toe mamulu ana fusi i se isi tagata.
Afai e oo i lea tulaga ona o le a umi o toe faatali AJ i se avanoa e toe lu’i ai mo fusi e fa na ia umia. Ae lē gata i lea, a mamulu fusi, e telē le avanoa e mamulu taitasi ai fusi ia e fa, ona faigata lea ona toe maua se avanoa e lu’i ai e AJ fusi uma e fa, pe a faapea e eseese tagata e see i ai fusi pe a faia’ina Ruiz a’o loma le fusuaga ma AJ.
O le $100 miliona o loo manao ai Ruiz e ova ma le tapulaa o loo ia Eddie Hearn. E mautinoa foi le teena e Hearn o lena manao. Afai e taunuu i se maliliega o se vaega tupe e tusa ma le 20 miliona Pauni o le a talia e Eddie Hearn. O le aofaiga lea o le tupe na maua e AJ i le fusuaga ma Ruiz Jr. Ae na’o le 5 miliona pauni na maua e Ruiz. Ae o le avanoa tonu lea e pulea ai e Ruiz ona manuia e maua mai fusi ua i ona lima. Afai e lē ioe Ruiz i le tupe e ofa e Hearn mo le fusuaga ma Joshua, e iai le aiā tatau a Ruiz e tetee ai le Rematch, ona saili lea o se isi ana paga e fusu i ai.
O le tulaga tāua mo Ruiz, e lē o iai ma se tasi i Amerika e mafai ona faatonuina lea ituaiga tupe mo fusuaga, tusa poo se fusuaga mo fusi e fa. E na’o Eddie Hearn e mafai ona mauaina tupe i luga atu o le 20 miliona pauni ($50 miliona NZ).
A’o saili se ioega ma se maliliega mo le fusuaga lona lua, ae o loo nofo taumate pea Anthony Joshua ma lana pulega i le mafuaaga na toilalo ai ia Andy Ruiz Jr. E tele tala faapea na pa’ū AJ i faipelega a’o loma le fusuaga, ma isi na faapea na manu’a AJ ae e lei fusu, ma le isi faapea na tau musu AJ e ulu i le maea e fusu ma Ruiz Jr.
O na tala feaveai uma ua lapisi e Eddie Hearn, na ia ta’ua ai e leai ma se faaletonu na oo ia AJ a’o loma le fusuaga ma Ruiz. E lei lavea foi pe na pa’ū i totonu o le maea. Ae ua faia’ina AJ ona o le tomai o Andy Ruiz i le fusuaga, na sili atu ai le fusu a Ruiz i lea po nai lo le fusu a Anthony Joshua.
Na faaalia e Eddie Hearn e lei manatua e Anthony Joshua se mea e tasi o le fusuaga mai le taamilosaga lona tolu e oo ina uma. E mafua lea i le malosi o le tu’i i le ulu na lavea ai i lima o Ruiz i le taamilosaga lona tolu.
