Ua masani ma silafia e tagata uma i lenei aai, le vaitaimi i le mae’a ai o polokalame o le Tutoatasi a Samoa i Kuiniselani, ae taualuga loa i le siva tele poo le po fiafia a tamaitai tuai o St Marys SMOGA (Ball) i tausaga uma.
O le ‘auga tonu ona o le fia pulupululima ma faasoa atu le alofa i le a’oga sa a’oa’oina ai i tausaga ua mavae. Ua faamuta le fesoasoani i sikolasipi mo tamaiti e pei ona amata mai i le 2007 seia oo mai i le 2017. O se lagona faagaeetia na momoli mai ai le faafetai tele a le tamaitai pule faapea le vasega o faiaoga ma le a’oga ona o le fesoasoani atu o nai tamatai ua nopia’i i atunuu i fafo, ao loo susu’e lava le faamalama ma tepa atu i Samoa.
Ona o le alofa le faatuaoia, e le faalogologotiga, ua finagalo ai le Tamaitai Pule Aoga Sister Pelenatete ina ia faagata loa sikolasipi ae sei faasafua lea alofa e ala i le faaleleia o mea totino ma vaega e faaaoga i ‘aoga a tamaiti e pei computers, lea ua agai iai le fesoasoani o loo auina atu.
O lenei po fiafia i tausaga uma, ose faamoemoe e tapenaina lelei, ma e toatele foi le paia ma le mamalu o le atunuu latou te lagolagoina le faatalauula atu a tamaitai tuai a le SMOGA i Kuiniselani. O valaaulia masani lava ua manatua e tagata lautele, ta’ita’i o asosi, faalapotopotoga, aemaise susuga i faafeagaiga ma faletua, faapea uo ma aiga. E ui lava la i le vaitaimi ua tetele ai le malulu, peitai e lē o solomuli lava le agaga foa’i ma le fia loto fesoasoani.
E leai nisi sailiga seleni o faia ale SMOGA seivaga ai lenei faamoemoe i le ogatotonu o le tausaga.
O galuega fesoasoani ma faagaigaioiga a le SMOGA, o le asia lea o le Age Care i Wynnum ma a latou lagolago masani i mea fai a le community.
O le susuga ia John Niko mai le Fijian Airways, o le sponsor tumau lava ale SMOGA o loo faatupeina nisi vaega. E le taugofie le tele o mea e faatino ai lenei faamoemoe o le Ball ae maualuga le faamoemoe i se seleni e maua mai, o le a fesoasoani tele mo le kolisi o St Mary’s i Samoa.
O le susuga i le faafeagaiga ia Rev Perelini Tauilo (EFKS) sa ta’ita’ia le sauniga lotu, o se tasi o faifeau e tuu lava lona tau’au ma le faletua ia Tili e fesoasoani ai i soo se faamoemoe o tama ma teine tuai o a’oga a le Katoliko i lenei Setete. O le fofoga o le po o le faletua ia Foloi Wall o le sui o le komiti.
Na tulai le susuga ia Rev Petaia Tuifao ma faamanuia le toast o lenei 57 tausaga o Samoa aemaise le faaauauina pea o le lagolago ale atunuu e opogi le faamoemoe e ala i le Ball a le SMOGA i tausaga uma, viia le Atua. E atoatoa le manaia o le po na maua e tagata uma le eva fiafia seia oo i le i’uga, i le patu’i malosi o musika mālie, lea na faatino ai faiva o le Tautai Band, Kolisi Leota ma le vaega.
Na faafetaia e le afioga i le Peresetene i latou uma o loo agalelei pea ma fesoasoani i lenei faamoemoe, e le gata o faafeagaiga, ae o le paia ma le mamalu o le atunuu, sui mai Asosi a tamaitai ma alii A’oga tuai a le Katoliko i Kuiniselani, e aofia Paul VI sa auai le Teuoloa ia Tili Tauilo faapea le failautusi ia Pelu Alo Emile, ma Tama Tuai o le Malisi sa auai le tofa Leafinealii Maiava ma le faletua ia Maria.
E toatele sa auai aemaise le faafetai ale Peresetene mo tamaitai tuai o le SMOGA lava ia o loo soosoo tau’au pea ma lagolago i nei sailiga seleni. Ia faamanuia tele le Atua!
O le komiti a SMOGA i Kuiniselani
Peresetene: Pearl Tupua
Failautusi: Jasmine Ah Kiau
Teutupe: Joyita Filemu Toaleapaialii
