Ua 28 tausaga le matua o le pou faasalalau mo le leitio o le 2AP na fausia i se fesoasoani a Ausetalia i le tausaga e 1990 ina ua mae’a le afā malosi o Ofa. Na auala lea fesoasoani ina ua faaleagaina uma pou faasalalau a le 2AP ia Ofa. Ina ua toe sosoo ma le isi afā malosi o Valelia i le amataga foi o le 1991, na aogā tele le pou faasalalau na fausia auā e lei motusia faasalalauga i lapataiga ma faamatalaga na faasalalau i le atunuu ina ua mae’a lea afā malosi.
O le malosi tele o lea pou faasalalau o loo faafofoga ai ma Amerika Samoa, o motu o Tokelau e oo lava i le motu o Niue. Ua faaletonu lea pou ma o le mafuaaga lea na talosaga ai le Malo ia Ausetalia pe toe maua se fesoasoani, ma sa faaauala atu lea talosaga i le vaega o fesoasoani a Ausetalia mo auaunaga tau faasalalauga e ta’ua o le PACMAS poo le Australia Pacific Media Assistance.
E 4 tesimale 1 miliona tala Ausetalia le tau o le pou faasalalau fou poo le 7 tesimale 8 miliona tala Samoa. O se galuega ua faafetaia ai e le Palemia o le atunuu susuga Tuilaepa Lupesoliai Sailele Malielegaoi le Minisita o le va i fafo o Ausetalia o Julie Bishop ona o le agalelei pea o lona Malo ma tagata o Ausetalia i le tautua faasalalau a le 2AP auā o le siufofoga lea o le atunuu atoa aemaise o le Malo i le faalauiloaina o ana fuafuaga o le atinae mo le manuia o tagata uma o Samoa.
O le 2AP o le leitio muamua lea na faatuina i le tausaga e 1948 i taimi o pulega a le Malo o Niu Sila. O se tautua sa avea ma fesootaiga tāua sa maua ai tala o mea e tutupu i le lalolagi ma Samoa aemaise o feau sa fia momoli atu i soo se itu o le atunuu. E manatua pea lea ualesi faasalalau i le tele o polokalame sa fiafia le atunuu e faafofoga iai.
O nei aso ua tele leitio ae o loo faaaogā le alaleo faasalalau o le FM, ae na’o le 2AP o loo faaaogā ai le alaleo faasalalau o le AM. E 12 masina le umi o le galuega o le a faatu ai le pou faasalalau fou ma o se kamupani mai Niu Sila o loo faia le galuega, faatasi ai ma kamupani i totonu o Samoa.
