E malaga mai lo tatou atunuu o aumau ma nonofo i fafo i ni faalavelave poo ni tafaoga i Samoa i le masina fou o Setema, ua lē toe maua se paka fua i nofoaga e tutu ai taavale i le taulaga o Apia.
O le mafuaaga ua faapipii ai nei mita e totogi ai le tu o se taavale i se paka.
O pakaga mai luma o le faletupe o le ANZ e oo atu i le nofoaga o le NPF Plaza lea sa iai le faleoloa o Molesi i tausaga e tele ua mavae ua amata ai lea faiga fou. Ina ua faalauiloa lea fuafuaga ma silasila le atunuu i galuega o le faapipiina o mita i le vaiaso ua mavae na faalogoina le tomumu ma le lē fiafia o nisi fai taavale.
E oo lava i luga o fesootaiga televavave i le facebook ua salalau ai manatu tetee o nisi i le mita o le paka o taavale i Samoa. Peitai o le saunoaga a le Pule Sili o le Pulega o fela’ua’iga i luga o le laueleele le afioga Galumalemana Taatialeoititi Tutuvanu Agnes Schwalger, o le fuafuaga ua leva ona faamaonia ma pasia e le Kapeneta ae o lea faato’ā faatino.
“O le aogā o le totogi o le tutu o taavale i paka e mafai ai ona maua le avanoa o le isi taavale e maua se paka, auā o le taimi nei ma tausaga ua mavae e fiu e fealuai e sue se paka ae o loo tu lava se taavale i le fia itula i se paka”. Na faaalia foi e le tamaitai Pule Sili e le o le saili tupe o le pulega o le LTA le faia o mita ae o le maua ai o le avanoa o tagata uma e tu i se paka. O le masina fou e amata ai le fuafuaga ae e lē o iloa tonu se aso e amata ai. E $1tala le paka mo le 15 minute o lona uiga e $2tala mo le 30 minute ae $4 tala mo le itula atoa. E faaaogā tupe siliva ae lē o tupe pepa.
E ono masina o le a amata ai i mita e valu ua faapipii mai luma o le ANZ i Apia e oo i le NPF Plaza, ae o loo tapena le LTA e faapipii foi mita i isi vaega o magaala eseese o le taulaga e oo atu lava i paka o loo tutu ai taavale i le maota gasegase i Motootua.
E lē o iloa pe na’o paka i le alatele pe aofia ai ma paka i totonu o le lotoā o loo iai le falema’i.
