Aumalaga mai Samoa a Fasitootai faapea se vaega o le mafutaga a Brisbane a’o feagai ma faaaloaloga

Aumalaga mai Samoa a Fasitootai faapea se vaega o le mafutaga a Brisbane a’o feagai ma faaaloaloga

Fai mai le pese a le EFKS “Tatou te olioli, tatou te faafetai, Ia Iesu le Keriso le ola e ola ai” Talitonu o le alalaga fiafia foi lea na lagona i lea aso. Ua matuai olioli ma faafetaia le Atua e le mafutaga a Fasitootai aemaise le paia o le aumalaga mai Samoa ona o le alofa foai o le atunuu ma le auvalaaulia e ala i le posiva lea sa faataunuuina i le Aso Toonai aso 11 o Aokuso.

O le afioga ia Patele Epati sa fai ma ta’ita’i o le sauniga i lea taeao auā se viiga e sula ai le alofa matalasi o le Matai i le lagi. Na sosoo ai ma le mālū taeao ona faagasolo lea ona tusia le aao foai o le auvalaaulia, faapea saasaaga faa-Samoa a matafale e 32 o le mafutaga.

Na faaalia le agaga meemee ma le faafetai o le susuga i le Fesoasoani, Tasipale Pula ma le aumalaga mamalu mai Samoa ona na tomua lava le faamoemoe i le alofa sasaa o le atunuu e ala i le solosolo lelei mai lava i le taeao seia oo i le taualuga, le aso talu ai le sailiga seleni mo le malu o le Atua i Samoa.

Lauga faaiu le taitaifono o le mafutaga a Fasitootai i Brisbane

Lauga faaiu le taitaifono o le mafutaga a Fasitootai i Brisbane

O le taitaifono le tofa ia Taufono Manū Levi sa fai ma fofoga o le aso e ala i le lauga faafeiloai ma faaaloaloga, ae o le tofa ia Fiu Vaigafa sa fai ma sui o Tumua ma Pule e faafetaia le mafutaga ona o le talā o measina e ala i le toga paia na fola i lea aso, na tofusia ai tagata uma na ma’au, milomilosia ma foai.

O le afioga i le tapaau faasisina ia Tole’afoa Sam ma le faletua ia Lona Mata’utia ma le Uncle Sam’s Takeaway o se tamafanau a Fasitootai, sa tapenaina le fofoga taumafa auā le paia i le auvalaaulia.

Na lē faapito a manū ia tasi i se tapuaiga poo se aiga ae na faamafola lava le aao o le Isaraelu moni ma foai e tali atu i le faatalauula mai a le Ekalesia Katoliko, na manuia ai le faamoemoe o Fasitootai i Kuiniselani. O taulaga soifua ma lupe faalele a le alalafaga faapea alo ma tamafanau, paolo ma gafa e malu ai le alalafaga, na tulai lava ma tali atu.

Ia faafetaia le Atua o Ia ua i’u manuia ai le faamoemoe, o le a taliu foi le aumalaga mai Samoa ma le oso maoa’e o le faigamalaga ona o le alofa tulai o aiga, ekalesia faapea uo ma ē masani ae tainane le paia lasilasi o le atunuu.