O moliaga e lua ua faaulu e leoleo faasaga i se tamaitai tausi soifua o loo taofia nei i le vaavaaiga a leoleo, ua fesiligia e le sosaiete o tausi soifua poo le ā le sa’o. Pe ua fetaui le faia o moliaga ae o loo faatali le taunuuga o suesuega o loo faia i Ausetalia ma Niu Sila. O le fesiligia o lea tulaga ua laumanu’ia ai i ni tala salalau solo e faapea e ono tapa e le sosaiete a tausi soifua se fautuaga faaletulafono mai se loia. O le Aso Toonai 4 o Aokuso 2018 na pueina ai e leoleo le tausi soifua ma molia ma taofia loa pe loka i le vaaiga a leoleo. Na faato’ā logotala le tusitala o lenei lipoti i le faia o moliaga i le ogatotonu o le vaiaso ua mavae atu nei ina ua maua se faamatalaga mai se molimau faatuatuaina.
Na ave loa ni fesili i le Loia Sili a le Malo le afioga Lemalu Herman Retzlaff lea na ave iai le faila o suesuega a leoleo. E atoa le Aso Lulu e lei maua ni tali ae ana lē toe tulitatao atu i se isi imeli ma faailoa iai o le a alu le lipoti e aunoa tusa lava pe lē maua sona finagalo, e lē toe maua le isi logo mai le failautusi o le ofisa o le Sooupu a le Malo na faailoa mai ai e lē toe mamao ae maua mai loa se faamatalaga tusitusia mai le Loia Sili a le Malo.
I lea faamatalaga tusitusia na faamaonia mai ai e Lemalu ua molia le tausi soifua ae faatoa iloa moliaga pe a oo ina valaau le mataupu i le faamasinoga. Na toe faia isi sailiiliga a le tusitala ma maua ai e lua moliaga o le tausi soifua.
O le moliaga o le faia o se tauplepulega e faaufiufi le faia o le amiotonu, ma le moliaga o le faatamala i le faatinoina o tiute. Ua faaalia e se molimau faatuatuaina o se leoleo sinia, o le Aso Lua o le vaiaso nei pe a valaau moliaga ma tulai le tausi soifua, o le a iloa ai nisi moliaga faaopoopo. O le a iloa ai foi pe iai se isi tausi soifua o le a molia. O le suesuega o le maliu lilo poo le inquest mo pepe na maliliu ina ua mae’a ona fai o la tuipuipui, sa faatulaga e valaau molimau i le Aso Lua o le vaiaso na tea nei. Peitai na faailoa e le itu a leoleo i luma o le faamasinoga e lei maua mai le taunuuga o suesuega o loo faia i fafo. O lea ua toe tolopo ai le suesuega o le maliu lilo i se aso o le masina fou o Setema.
