O le foua o pulegamalo a Fiti e le ta’ita’i o le fitafita a lea Malo ua avea nei ma Palemia le susuga Frank Bainimarama, na ilitata ai lagona o ta’ita’i o Malo o le Pasefika e aofia ai Samoa. E lē tau faailoa finagalo o le Palemia o Samoa na faatutu ia Bainimarama ona o le tulaga na aafia ai upufai o lea Malo.
I le tuanai o na tausaga ma foi le atunuu o Fiti e filifili ni ta’ita’i o le Malo ma filifilia ai Bainimarama e avea ma Palemia, e lei liua ai lagona tetee o lea ta’ita’i i lona le auai i ni fono a ta’ita’i o le Pasefika.
Na maea le fa tausaga muamua o lana pulegamalo e lei auai i se fono, lea ua toe filifilia e ona tagata e avea ma ta’ita’i o le faigamalo o loo tulai nei e lei auai lava i se fono.
O le tausaga ua mavae na malaga ai le Palemia o Samoa i Fiti i le faailogaina o le 50 tausaga o le Iunivesite o le Pasefika, ma o le avanoa lea na valaau faaaloalo ai Bainimarama ma lana faigamalo i le ta’ita’i o le Malo o Samoa e malaga atu o se malo faaaloalogia ma avea ai o se malaga aloaia faalemalo poo se state visit.
Na fuli Bainimarama e faaali lana tali faaaloalo i le faatino o vaega uma e tusa o tu ma aga faavaomalo pe a asiasi atu se ta’ita’i taualoa o se isi Malo. O le avanoa lea na fofola ai le fala o ta’ita’i o Malo e lua ma talanoa i itu e manuia ai atunuu ma ona tagata.
O lea ua fua mai i ni fua lelei ia feiloaiga ina ua filifilia mo se taimi muamua se Amepasa o Fiti mo Samoa, aua o tausagaua mavae sa nao sui filifilia o lea Malo e na’o na malaga asiasi mo ni talanoaga faavaomalo ma taitai o Samoa poo se Roving Ambassador. O le uluai Amepasa lea o Fiti ua tauaao aloaia ona tusi tofiga poo credentials i le Ao o le Malo lana Afioga Tuimalealiifano Vaaleto’a Sualauvi II.
I se avanoa na fesiligia ai le Amepasa o Fiti mo Samoa le susuga Ratu Tuinausori Cavuilati, na ia faailoa ai e tele vaega o loo fia tufa mai ai fesoasoani a lona Malo. E lē gata o atina’e o le tamaoaiga, o fefaatauaiga aemaise o le atina’e o taaloga e pei o le lakapi. Na faailoa foi e le Amepasa o le toe vava lalata o sootaga o atunuu e lua o le faitotoa lea o le a fetufaa’i ai tomai ma silafia o ta’ita’i i galuega ma tautua e faaleleia ai le soifuaga o tagatao Fiti ma Samoa.
O le faamanatuina o le Tutoatasi o Samoa i le tausaga ua mavae na valaaulia ai le Pelesetene o Fiti. O loo iai le talitonuga o le a faapea foi ona iai se sui o lea Malo e auai i le Sisigafu’a o le tausaga nei. O ai na iloa e pei ona saunoa le Amepasa o Fiti mo Samoa, atonu poo le a malaga mai le Palemia o lona Malo. O le sui aloaia o Fiti mo Samoa o le a avea foi ma sui o lea Malo mo isi atunuu o le Pasefika.
O Fiti ma Tonga o atunuu ia o loo taufai malolosi nei i le taaloga lakapi, ma o sootaga o atunuu e tolu na amata mai i tausaga anamua ao folau tagata ma feasiasia’i e pei ona matilatila ia sootaga i talatuu o Samoa, Tonga ma Fiti.
