E lē toe iloa se aso e mafai ona toe foi ai i Ausetalia le alii Samoa o loo aumau nei i Ausetalia, o Malele Atofu Paulo, poo King Faipopo, ina ua taofia e leoleo talu ai ana lafoga ia na lafo faasaga i le Palemia, Tuilaepa Lupesoliai Sailele Malielegaoi ma pue i le video ma tuu i luga o upega tafailagi.
Peitai, pe taofia e leoleo i lana malaga lea na sau ai nei i le maliu o lona tina, o fuafuaga a ia a King Faipopo, e taliu mai ma nofo mau i Samoa e vaai ona tuaa.
O le malaga lea na sau ai nei King Faipopo, o le maliu a lona tina peitai na maua ai ma le avanoa o leoleo e taofia ai, a’o agai e faatau sana sim card telefoni i le SNPF Plaza i le afiafi o le Aso Faraile na tea nei.
O le faamatalaga a King Faipopo, ina ua tatala i tua mai le ofisa o leoleo i le taeao o le Aso Toonai na tea nei, na iite lava e faaono taofia ia e leoleo, peitai, e pau le tulaga nai lona mafaufau o le malaga mai i le maliu o si ona tina, ma faamavae atu ai. “O loo faatali mai le lotu o le maliu o lo’u tina, o nei, Aso Toonai e tanu ai, ae o loo faatali mai se’i tatala atu a’u i tua.”
Na fesiligia le alii o King Faipopo, pe aisea na ala ai ona ia faia ia tuua’iga faasaga i le Palemia, ae na ia faaalia e na te mautinoa ma o loo ia malamalama lelei i ana faamatalaga na fai. “O lea ou te malamalama ma ou iloa lelei la’u mea lea e fai, pau a le mea, o le mea sili o lea ua tatala mai a’u i tua se’i ou alu ou te faamavae i lo’u tina.”
O le tamaitai loia, Unasa Iuni Sapolu, ma nisi o sui o le Samoa Solidarity International Group, SSIG, na faatalia le tatala mai i tua o King Faipopo i le ofisa o leoleo. O Unasa o ia o le tamaitai loia a le alii o King Faipopo. Sa auai foi le faifeau a King Faipopo i le taumafaiga lava ina ia mafai ona tatala mai i tua King Faipopo e auai i le maliu o lona tina.
Fai mai le loia a King Faipopo, Unasa Iuni, e lua lava moliaga e fesootai agai i moliaga o le taofiaina o lea alii. “O le moliaga muamua e faatatau lea i faaupuga na ia faia i luga o le social media lea e faapea o Tuilaepa na taulamua i fuafuaga o le fasiotia o Luagalau Levaula Kamu, lea na avea ma minisita o le Kapeneta i lena vaitaimi. O le isi moliaga o tuua’iga na faia e King Faipopo faapea o Tuilaepa na ia tusia se tusi e faatatau ia Toi, o le isi foi sui faipule o le HRPP lea na loka i le falepuipui.”
Ua faatulagaina o le aso 5 o Mati i le masina fou, lea e valaau ai le mataupu a King Faipopo i le faamasinoga i Mulinuu, peitai na ta’ua e Unasa, o le a taumafai e finauina i le faamasinoga, nisi tuutuuga e mafai ona fai faasaga i le taofia o King Faipopo. “Ou te talosagaina pe mafai ona fai ni variations i le bail, ona e faigaluega i Ausetalia, e lē gata i lea o loo faamuli mai Ausetalia si ona aiga ma si ana fanau.”
Na ta’ua foi e Unasa, ua mae’a foi ona ia faailoa ia King Faipopo, o le a taumafai latou te lagolagoina le tuuina atu lea o ni sureties poo ni vaega e faamau ai le faamaoniga e toe taliu mai King Faipopo e tali i ona moliaga poo tuua’iga ua tuua’ia ai o ia. Ae o se faamatalaga tusitusia mai leoleo o ta’ua ai o suesuega faasaga ia Malele na amata mai ia Aokuso o le tauaga 2018. Ina ua faaulu se faasea aloaia a le Susuga Tuilaepa Sailele Malielegaoi i leoleo, faatatau i tuua’iga taufaaleaga na faia e le Susuga Malele.
Na tuua’ia faalauaitele ai e Malele le fasioti tagata, piopio, gaoi, o le aumai faasolitulafono o fana, ma isi faaupuga taufaaleaga tagata o loo teena uma e Tuilaepa. Pe afai e faamaonia ia tuua’iga, o le faasalaga faafalepuipui e lē sili atu i le tolu masina i le moliaga. Ua tatala ai Malele poo King Faipopo i tua, i lalo o tuutuuga e aofia ai ma lona lipoti i le Ofisa suesue i Aso Faraile uma.
Ua atofa le aso 5 o Mati e tulai ai i luma o le Faamasinoga. O aafiaga o tagata lautele mai lafoga e faamamasagia ai le isi tagata, ua iai tulafono e puipuia ai, ma o faaseā ua oo atu i leoleo, o le a taumafai foi e fesoasoani i tagata e aafia i faamatalaga sese.
