Le afioga Tuala Iosefo Ponifasio

Le afioga Tuala Iosefo Ponifasio

Ua faamamā le suafa o le afioga Tuala Auimatagi Iosefo Ponifasio mai moliaga o faiga faaalatua ma gaioiga solitulafono na faamaonia e le faamasinoga faaitumalo, e mafua i tuua’iga na faaulu e nisi o lana komiti sa lagolago i lea tamalii a’o tapena o se sui tauva i le faigapalota tele o le 2016. Sa tauva lea tamalii i le faiga filifiliga a le itumalo o Gagaemauga Numera Tasi.

O le Aso Faraile ua mavae na aumai ai le faaiuga a le faamasinoga maualuga i le talosaga apili na faaulu e Tuala Iosefo ma lana loia o Mauga Precious Chang na toe lu’ia ai le suesueina o molimau a le itu tagi. E ono moliaga na faamaonia ae o lea ua soloia uma ma faalēaogā e le faamasinoga maualuga, o le faasalaga foi na faia e le faamasinoga faaitumalo ua faapena foi ona lē faaaogāina.

O le afioga i le tamaitai Faamasino o le Faamasinoga Maualuga, Tafaoimalo Leilani Tuala Warren, sa seei i le suesueina o le apili.

O mau na tuuina atu e le itu talosaga e faavae ai le talosaga apili sa finauina ai itu tau tulafono i le faatinoina o galuega a le faamasinoga i le suesueina o ni moliaga, aemaise o le valaauina o molimau e lagolago ai ni tuua’iga. I le silasila a le faamasinoga maualuga e iai vaega sa lape ai le faatinoina o suesuega o molimau ma le faagasologa o taualumaga o le faamasinoga, aemaise o se lape i tiute tauave o le faamasino o le faamasinoga faaitumalo na tagofia le mataupu. Mo le silafia o moliaga na suesueina na faaulu e Taulamago Simone o Leauvaa, Itulau Enele o Leauvaa, Faatauu Malautea o Leauvaa, Tevaga Samilolo o Samalaeulu ma Va Ve’a o Samalaeulu.

O lape na maua i sailiiliga a le faamasinoga maualuga na ta’ua e le tamaitai faamasino o Tafaoimalo Leilani i lana faaiuga, na mafua ai ona noatia le itu talosaga i le faia o le amiotonu i le tuuina atu o ana mau e lagolago ai lona teena o tuua’iga.

E iai molimau a le itu tagi e lei tutulai e faia ni mau tuu fofoga e avanoa ai le na faasaga iai tuua’iga ona fesiligia ina ia maua atoa ai e le faamasino na feagai ma suesuega, le taatiaga atoa o le mataupu ma faia ai sana faaiuga mautu.

Peitai ua ia faaaogā i lana faaiuga mau a le itu tagi e lei manino lona autalaina i le taimi o suesuega.

O le tasi itu na ta’ua i le faaiuga o le apili, o nisi na faia tuua’iga e lē o ni tagata o lesitala suafa i le lola palota o le itumalo o Gagaemauga Numera Tasi.

O isi vaega na lāgā i le faaiuga sa tatau ona silasila le faamasinoga faaitumalo aemaise le faamasino na feagai ma suesuega i mafuaaga na faavae ai tuua’iga ona a fua i molimau na folasia o loo atagia manino ai taaviliga o faufauga faaletagata (motives).