Select Page
Air Malindo sa lisi e le Samoa Airways

O le taofia ai o faigamalaga a vaalele i totonu o le atunuu faapea foi nisi o atunuu sa malaga ai le vaalele a le Samoa Airways e pei o Niu Sila ma Ausetalia, na mafua ai se faaiuga a le Malo ina ia toe faafoi le vaalele o le Air Malindo mai Meleisia lea sa lisi mai e le Kamupani Vaalele o le Samoa Airways. O lea faaiuga ua laveai ai nisi o tupe a le Malo ona e leai se aogā e faaauau ai pea lenei lisi ae ua leai ni faigamalaga a vaalele. 

Na faamaonia mai foi e le Pule Sili o le Samoa Airways le susuga ia Seiuli Elvin Tuala le toatele o le aufaigaluega a le Samoa Airways ua mālōlō mai ai i galuega ona ua lē toe feoai ni vaalele, o i latou o loo mālōlō ai i le taimi lenei o loo maua pea o latou totogi, peitai, e na’o le ‘afa o a latou totogi masani o loo mafai ona maua i lenei taimi e fesoasoani ai i le tausiga o latou aiga. 

O nisi o le aufaigaluega ua ave ai o latou aso livi seia vagana ai nisi o le pulega e toafā e aofia ai ma le Pule Sili ia Seiuli Elvin Tuala, ua faataulaga o latou tagata i le taimi lenei, e leai ni o latou totogi o toe maua.

Faamaonia mai foi e Seiuli le faagasolo ai o faatalanoaga a le Pulega o le Samoa Airways ma nisi o kamupani vaalele mai atunuu e mamao i se avanoa e toe maua mai ai se isi vaalele e lisi e Samoa. 

O loo faamoemoe le pulega o le Samoa Airways e tatau ona oo atu ia Iuni o le tausaga lenei ua toe maua mai se isi vaalele e sui a’i le Air Malindo lea ua toe faafoi, peitai, e faalagolago uma ia gaioiga i le aso e toe tatala ai faigamalaga a vaalele ona e manaomia foi ona malaga inisinia faapitoa a le Samoa Airways e autilotilo i vaalele o loo ofa mai e nisi o kamupani vaalele i atunuu mamao.

O se tasi lenei o kamupani na faamanuiaina ai i nisi o vaegatupe na faamatuu mai e le Malo i le fonotaga a le Palemene i le vaiaso na tea nei, lea e tasi le miliona tālā na tuuina atu i le Samoa Airways e totogi ai ana aitalafu a’o tapunia faigamalaga a vaalele i lenei taimi. Saunoa foi Seiuli Elvin Tuala, o loo iai lava nisi o le aufaigaluega o loo galulue ai i le taimi lenei ona e tatau pea ona galulue mo nisi o galuega e manaomia ai e le kamupani vaalele. 

O se tasi lenei o auaunaga a le Malo sa telē sona sao i tupe maua a le atunuu mai i tagata tafafao maimoa mai fafo, peitai, ua telē foi le aafiaga ona o le tapunia ai o faigamalaga mai atunuu i fafo aemaise lava ia Niu Sila ma Ausetalia lea sa mafai ona malaga atu i ai le Samoa Airways. 

O loo fai mea faalogo foi le Pulega o le Samoa Airways i le taimi lenei i atunuu nei e pei o Niu Sila ma Ausetalia poo afea e toe tatala ai ona alavaa mo vaalele, ona e leai se aogā e toe tatala ai faigamalaga a vaalele a Samoa ae leiloa poo fea e felelei ai pe afai ae faaauau pea le tapunia o malaevaalele a Niu Sila ma Ausetalia. 

O loo iai foi le naunautaiga o le Pulega o le Samoa Airways ina ia sili atu se isi vaalele fou e aumai ai mo le atunuu nai lo le vaalele lea ua toe faafoi.