Select Page

O le mau a le alii fesoasoani ia Pio Paiti i le taimi na ia vaaia ai pagota o nonofo i fafo o lona maota i le vaveao o le Aso Tofi ua mavae atu nei, sa fefe lona toalua e alu i fafo ma le fale ona o lana vaai o pagota ia o loo sue, ae ina ua ia vaai i ai i le talosaga mai na oso vave lava le alofa. “E mo’i lava o pagota tatou te feita i ai, ae leaga le mea e vave o le alofa i le saofafa’i mai ma le augani mai i se meaai, le ala lena na faatino ai le galuega alofa e fafaga.”

O le vaveao lea sa sauni le aiga e malaga atu i Faleaseela tai, e pei ona masani ai poo se taimi o le ta o le lima i le vaveao, mo le taulaga paia o le Misasa. O le tina o le aiga na ia muai iloa le aualii o nonofo ai i fafo o le fale ina ua tu’itu’i le faitotoa. Sa fafagu atu le alii fesoasoani ia Pio ma ia nofo tata a’e ai loa i luga, ua faate’ia ina ua ta’u atu alii pagota.

Na oo atu ma tilotilo e toafā le aualii ma na tasi lava lana vaai o pagota ia o loo sue, na ta’ua e Pio sa talosaga ane e mamanao e toe vili le ofisa o leoleo, ua toe fia foi i totonu, ae mananao la e vili leoleo i le ofisa i Lotofaga ta’u atu ma le numera. 

Na ta’ua e le alii Fesoasoani ua fiu e vili le ofisa lea i lea vaveao, na ala ai loa ona vili le numera o le ofisa autu.

“Na vili mai le ofisa autu, ma faailoa mai i ai o pagota ia e saofafai i luma o lo matou fale, ae lē talitonu atu le ofisa lea. Na uma lea ae augani atu i se vai, na ta’ua e le fesoasoani sa fefe lava lona toalua e tatala le faitotoa….”

Na musu lava lo matou aiga e tatala le faitoto’a ae ou alu atu a’u ia tatala ma faasaofafa’i i lalo i luga o le fala ma avatu i ai le vai ma faafeinu, na ou valaau mai le matou aiga e fai se meaai, sa faavevela e le loomatua le meaai sa i luga o le ogaumu, o le pisupo ma le alaisa faapea ma falaoa ma avatu i ai. Na uma lelei na ‘ai e nai tama.”

Na faamatala e le Alii Fesoasoani mai lea lava taimi umi sa tuuvili atu lava le ofisa e vaai pe faamaonia o pagota ia. 

O lana faamatalaga o se taimi tāua lea ua talafeauga lelei ma le vaitau lenei i lo latou ekalesia o le faia o se galuega alofa i se tagata, e ui lava ina faapea o i latou ua ta’usalaina ma tatou te feita i ai, ae faafetai ua maua se avanoa e lo latou aiga e feosoasoani i ai.

E taunuu atu le ofisa o leoleo o aai lava pagota ma faapea atu le isi alii leoleo, “E leai se mea e faapopoleina ai faifai lemu la latou taumafataga, mea sili o lea e maua mai o loo to’afilemu lelei e leai se isi o momo’e pe ua sola o lea e maua mai o fai le meaai, ua alu foi le po o sosola i latou ia o le tulaga sili ona tāua lea ua toe lagona ifo e toe foi mai.”

Na ta’ua foi e le Alii Fesoasoani e talitonu ana maua e nisi o lo latou afioaga ia masalo e fasi pe o le ā se tulaga e oo i ai, sa ia lagonaina foi ina ua oo atu nisi o tupulaga ma faapea atu “Ua sa’o le mea ua o mai i ai.”

E leai se isi o i latou e toafā sa faaupegaina, ae sa fesili atu ia te ia pe fia ni pagota na o i tua sa ia ta’u atu i ai e 30 ma ona tupu, ae ofo ona o la latou tau na o uma i tua le 50 sa i le potu na matala. 

O lona uiga e lei o faatasi sa o vaega e lē o iloa foi e isi le tulaga ua oo i ai isi.

“Na ou fesili atu foi i ai poo le ā le umi o faasalaga, ae fai mai o nisi toe lua masina la e totoe, o isi e toe lua vaiaso, o le isi o le aso 8 o Aperila e magalo ai, na ou vaai atu pei ua salamō foi lea ua vave na o i tua a lea ua toe fai lenei mea o le a toe faaopoopo ai aso e nonofo ai i le falepuipui.”

Na saunoa le alii fesoasoani sa faia foi lana apoapoaiga i le faigata o le nofoaga o loo nonofo ai, ae lē o galo lava latou i talosaga a faifeau, aemaise o aiga e lē o galo latou, ma e lē faapea foi ua ave latou e tia’i, o lea e tapuai atu ina ia mae’a mai faasalaga ae toe foi mai ma se suiga i mafaufau ma loto ma ia faaaogā le ola e tautua ai aiga, nuu ma ekalesia.

“Sa talitali io a nai tama ma fai mai e sa’o lelei.” Sa ia faapea atu foi i ai o le tulaga lelei lava o le salamō ma toe foi, ma faamaoni e tuli faasalaga e vave ai foi ona magalo. 

E talitonu le Alii Fesoasoani, masalo ana faavevesi ailoga e maua ae ona sa avatu i ai i le auala maualalo le feau e tatau ai mo latou nei.

“O le agaga lava o le Atua na mafai ai ona talia i le lotoalofa ma le agaga maualalo nei fanau, ma faaosofia ai foi a’u e fesoasoani ma laveai. Pau a le agaga na oo mai ia a’u o le alofa ma le vaai i mata o fanau, e lē ese a ma lo’u atalii matua. E pei a o le a’oa’oga aua le faailoga tagata, o ai lava e sulu atu ia alofa i ai pe pagota pe leai ia alofa pea i ai.”

“Na pau le tulaga sa lagonaina i le aualii o le nofoaga e lē lelei le faiga o latou, e fai i latou pei o manu, ia e avatu ai foi le tuualalo i le pulega e lē tatau ma fetaui ona fai faapea nai ia foi tagata e tatau lava ona fai pei o tagata soifua uma, e ui o lea ua faamaonia solitulafono ae lē ese lava i latou ma i tatou foi.”