E ui o loo faatuputupulaia pea tupe faaalu a le malo o Samoa i tupe maua i le $8 miliona pe tusa lea o le 1.7% o le tamaoaiga o le atunuu ae na saunoa le Alii Minisita o Tupe ia Sili Epa Tuioti i le Aso Lua ua mavae i le palemene e tāua lenei tala faaopoopo o le tupe mo le atunuu i le malo, ona o le amataga o tapenaga mo le tali atu i aafiaga o le KOVITI-19. Mo lenei lava tala faaopoopo lona lua o le tupe ua vaaia ai le siitia o le tupe faaalu i le 0.5 % pe a faatusa atu i le 1.2% sa fuafuaina mai e le malo i le amataga o lenei tausaga.
O fonotaga tetele, o taaloga sa fuafua e talimalo ai Samoa faatasi ai ma le faatuputupulaia o atina’e e gaosi ai oloa mo maketi i atunuu mamao, atoa ai ma le siitia o le atina’e o tagata tafafao maimoa mai i le atunuu, sa faamoemoe le malo e ono siitia ai le tamaoaiga o le atunuu i le 3.7%. Ua lē o lea le tulaga ua tulai mai, o le tapunia o femalagaa’iga i le tele o atunuu, ma le leai o nisi e toe fia tafafao mai ona o le popolega i maua i lenei faama’i, ua matuā aafia tele ai le atin’e o turisi sa faamoemoe i ai Samoa, aemaise ai o lea ua sosoo mai lava le faama’i o le misela sa aafia ai Samoa ma lenei faama’ioti ua aafia ai le lalolagi.
O le aafiaga i maketi i fafo sa faipaaga ma Samoa e auina atu i ai oloa gaosi a le atunuuu, faapea ai galuega sa galulue ai alo ma fanau a le atunuu, lea sa lafo mai ai tupe mo aiga ma mātua i Samoa. Na saunoa le alii minisita, “Ua lē o mautinoa nei pe oo ia taligāmalo sa fuafua i ai le atunuu, ma ua toe fetuunai ai e le malo lana fuafuaga mamao, ma iloa ai le ono pa’ū o le tamaoaiga o Samoa ma faaitiitia i le -2.2%, o lea vaaiga taulai o loo ogatasi lava ma valoaga i le tamaoaiga o le lalolagi i le taimi nei.”
“Ae mo Samoa lava ia ua ave le faamuamua a le malo i le saogalemu o le atunuu mai mala e ono alia’e mai.”
O le $66.3 miliona ua faailoa o le tapenaga muamua lea a le malo mo galuega faatino i le isi 3 i le 6 masina o lumanai ai nei. E aofia ai i lenei tapenaga le polokalame ua faataatia e fesoasoani ai i le atunuu ua fuafuaina i ai lea seleni i ona vaega nei.
Vaega tupe faatatauina mo Tapenaga ma Galuega Faatino a le Vaega o le Soifua Maloloina
Faamāmā Avega mo le Vaega Tuma’oti (Private Sector)
Faamāmā Avega mo Tagatānuu
Vaega Tupe mo le siitia o atina’e ma galuega a le Matagaluega o Faatoaga
Vaega tupe mo tapenaga a isi vaega Tuma’oti
O le fasi keke muamua o le keke ua vaevaeina nei o loo maua e le vaega o le Soifua Maloloina mo galuega faatino, e pei o galuega auā le puipuia ma le tuuitiitia o le pepesi o le Korona Vairusi, o le fausiaina o potu faapitoa (negative pressure room) e taofia ma tausia ai gasegase o le Korona Vairusi. O le fausiaina o potu faapitoa e taofia ai ē ua masalomia i le Korona Vairusi, o nofoaga e taofia ma mata’ituina ai i latou o ē malaga mai fafo (Quarantine Centres). O le faatinoina o ripoti ma suesuega mo gasegase o lea faama’i, atoa ai ma vailaau ma meafaigaluega e moomia mo le falema’i mo le vaaia ma le togafitia o gasegase o le Korona Vairusi. O le seleni o le a faaaluina ai e tusa lea ma le $20.3 miliona.
Mo le vaega tuma’oti e $12.5 miliona, o le a faaaluina i vaega e pei o le NPF (Faaputugatupe mo le Lumanai Manuia o Tagata), lea ua aiaia ai a latou faamāmā avega e lua e aofia ai le 6 masina e lē totogia ai saofaga mo soo se pisinisi o loo i lalo o le vaega ma’oti o tagata tafafao mai fafo, e pei o Faletalimalo ma fale’aiga. O le isi faamāmā avega e aofia ai le 2 masina e lē totogia ai lisi i luga o soo se nofoaga a le NPF, faataitaiga e pei o le NPF Plaza ma isi.
O le ACC poo le Faalapotopotoga o Faalavelave Tutupu Faafuase’i, e ono masina foi o loo ua tuusaunoaina ai le totogiina o saofaga mo soo se pisinisi i lalo lava o vaega o faletalimalo ma fale’aiga. E lua masina o le a lē totogiina ai saofaga a tagata faigaluega i lea faalapotopotoga e pei ona masani ai soo se tagata Samoa. O le a lē totogiina le lisi a soo se tagata o faaaogāina soo se nofoaga a le ACC e aofia ai ma le maketi i Fugalei, faataitaiga o le au faatau meamata ma faatau oloa i le maketi, o le a saoloto le faatauina o meamata e aunoa ma se totogi o le poloka lea pe tusa ma le $6 i le poloka e tasi. E $2 miliona ua faamatuu mai e lea faalapotopotoga e fesoasoani ai i le Tala Faatatau Faaopoopo Lona Lua o le Tupe a le Malo.
E amata atu i le masina lenei, o le malosi tau eletise e 50% o le a tuuitiitia ai le tau faapitoa o le eletise mo pisinisi faletalimalo. E lua foi masina o le a faapafala ai le totogiina o laisene o pasi ma taavale la’upasese, atoa ai ma le taofia o le tau o sala mo ē tuai ona pasi taavale ma e aofia ai tagata uma i lea faapitoa. O le matagaluega o Tupe maua ma lafoga ua tolopoina i le 2 masina le aso e tatau ona totogi ai lafoga i luga o tupe maua, ua aveesea foi le sala mo kamupani ma pisinisi e tuai ona totogi atu ia lafoga.
O le vaega o uafu e 3 masina o le a lē totogiina ai lisi o pisinisi i luga o uafu uma o le atunuu, toe faaolaina atu le 3 masina o laisene i auaunaga mo le la’uina o oloa i luga o le uafu (Stevedoring). O le tau o auaunaga i luga o le uafu lea e masani ona faasavali ai pepa pe afai e aumai se faamomoli (Wharfage fees) ua toesea le 20% mo le 3 masina.
E ui e lē o toe iai se vaalele o toe sesee ia tatou malaevaalele ona o lea e tapunia e oo lava foi i fale’aiga ma pisinisi o loo iai i malaevaalele ua tapunia, ae o loo tuuina atu e le malo lana faamāmā avega i le aufaipisinisi o iai i ia malaevaalele mo le 3 masina e taofia ai le totogi o lisi. Ua faaopoopoina oloa tau faatoaga ma faigafaiva i le lisi o fesoasoani a le malo mo le tuusaunoaina o tiute, o lona uiga o le a pa’ū tiute o ia oloa.
O le matagaluega o tupe ua tuuina mai ai le 3 masina e tauaveina ai e le malo le totogi o nonoga tupe mo atina’e i lalo o polokalame o loo iai le faamalumaluga a le malo ma o loo faafoeina i lalo o le Business Hub. E lua masina o le a tauaveina ai e le malo tului o nonogatupe (interest rates) a le atunuu lautele i le Faletupe o Atina’e o Samoa atoa ai ma le 3 masina e lē totogia ai lisi o pisinisi uma o loo faatautaia i le Faletupe o Atina’e o Samoa. E lua foi masina o le a lē totogia ai lisi mo pisinisi uma o loo i maketi a le Faalapotopotoga mo fanua o Samoa (Samoa Land Coporation) e pei o le Flea Maketi i Savalalo, Vaitele ma Salelologa, ma e faatupe e le malo lea fesoasoani.
E ui ua toe faafoi le vaalele o le kamupani Vaalele a Meleisia le Malindo ma o loo tausaili nei se vaalele e sui ai lea vaa mo le faaaogāina e le kamipani vaalele o le Samoa Airways, peitai e $1 miliona lea ua faamatuu atu e le malo i le tala o le tupe lenei, e fesoasoani ai i le totogiina o pili tuua a le Samoa Airways i ana paaga i Samoa nei.
O le faamāmā avega mo tagatānuu ua faaalia ai le $27.5 miliona le tupe e faaaluina ai i faamāmā avega mai matagaluega ma faalapotopotoga a le malo mo le mamalu o le atunuu, e ui lava o loo mafuli atu le lelei ia i latou o faigaluega ai i galuega faletalimalo ma fale’aiga faapea taavale la’upasese ma vaalele. O se tulaga na faaalia e nisi e lē o talafetaui ai lea faasoa a le malo, ona o le taimi nei e leai lava se isi e lē o mafatia. O tagata uma foi o loo totogi lafoga ma faisao atu i le atina’ega o le malo. O loo taatele finagalo i le tulaga sa fuafua e maua sina seleni mai le NPF e pei foi o le misela e fai ai lenei taimi a’o tapunia ai le atunuu.
le faamāmā avega ua tuuina mai e le NPF e mafai ai ona toe faafoi mai i tagata lautele faisaofaga le totogi o latou nonogatupe mo le masina atoa o Mati o lenei tausaga, faataitaiga afai o oe sa fai se nonogatupe i le NPF ma o loo toese i ai se vaega o lou totogi ta’i vaiaso o le a mafai ona e toe oo atu i le NPF ma toe aumai i tua au peimeni ia mo le na’o le masina lenei o Mati. Mo i latou ua faamalolo mai i galuega i le vaega o Faletalimalo ona o aafiaga o le Korona Vairusi o le a mafai ona tuuina mai le 20% o lana saofaga atoa i le NPF. O lona uiga afai o oe e $50,000 lau saofaga o loo iai i le NPF o lea ua e aafia ma ua leai sau galuega ona o le faama’i lenei ma ona aafiaga, o lona uiga o le 20% o lau $50,000 ua mafai nei ona e talaina mai i tua mai le NPF. Ua faailoa o le fesoasoani lenei sa lē mafai ona agavaa i ai sui faisaofaga se’i vaganā ua litaea mai le galuega, ua maliu pe ua faamaonia foi o le a tuua le atunuu e lē toe foi mai.
Mo le lautele o le atunuu e 10% lea ua faaitiitia ai le tau o le lesitala o taavale, i le faamāmā avega a le LTA. O le a mautinoa le pa’ū o nisi o oloa o taumafa e moomia mo aso uma, ona o le faamāmā avega a le Matagaluega o tiute mo tagatānuu, lea o le a faapafala ai le tiute i luga o nei oloa. O lona uiga o oloa e pei o le fasimamoe lea e silia i le $20 i le kilo e tasi o le a faaono pa’ū lona tau.
O teuteuga o le keke, ua maua mai lea i le penisione a tagata matutua, ua siitia maualuga ai mo le na’o le masina e tasi i le $300 e lē aofia ai le $145 lea e masani ona maua i Aperila, o le fesoasoani lea a le Matagaluega o Tupe. E 2% o le a totogi ai e le malo le tului o nonoga tupe uma a le atunuu i faletupe i totonu o Samoa, lona uiga e totogi lava lau peimeni, ae e totogi e le malo le tului a le faletupe i luga o lau aitalafu mo le 2 masina. E 10 sene o le a tuuitiitia ai le tau o le eletise ae 20 sene le tau o le vai.
E $3.5 miliona le tupe ua tuuina atu mo le siitia o atina’e ma galuega a le Matagaluega o Faatoaga ma Faigafaiva, mo le unaia o polokalame tau faatoaga ina ia maua pea taumafa mo le atunuu i taimi uma. O lea foi seleni o le a tuuina atu sona vaega i le Faalapotopotoga o Suesuega faasaienisi a Samoa auā le gaosiina o oloa e pei o le falaoamata, suauu popo, o le pata margarine ma isi oloa moomia o aso uma e faaaogāina ai fua o faaeleeleaga o loo maua i totonu o le atunuu. Ae o le $2.5 miliona ua faaagaga mo polokalame e tali atu ai i le Kolona Vairusi. O le a galulue le matagaluega o tupe e faamautu ma faamausali manaoga ma galuega a Vaega Ma’oti e pei o le Matagaluega o Leoleo, Falepuipui, ma Auaunaga mo Faalavelave Tutupu Faafuase’i, Vaega o Aoga, Vaega o Fesootaiga, ma le vaega o Galuega faatino i Nuu ma Alalafaga.
Mai le $66.3 miliona o le aotelega o le polokalame lenei a le malo e fesoasoani ai i ona o aafiaga o le korona vairusi, e tusa ma le $18.2 miliona o loo faatupeina lava e faalapotopotoga ia latou tupe maua masani. E $9.8 miliona o loo faaupu mai faapea o le sao lea o le malo e ala i ana tupe maua lea sa fuafua e aoina mai ae ua lē faataunuuina ina ua tuusaunoaina lafoga ma le tau o isi auaunaga mo ona tagatānuu. O le $38.3 miliona o loo tuuina atu i le tala o le tupe lenei atoa ai ma isi polokalame faaopoopo o loo ta’ua e faapea o loo fesoasoani mai ai nisi o paaga masani a le Malo.
Ua ta’ua e le alii Minisita o Tupe ia Sili Epa Tuioti, o le mae’a ai o le faatinoga o polokalame faamāmā avega nei a le malo o le a fesoasoani lea i le toe siitiaina o le tamaoaiga mai le -(2.2%) lea na ta’ua muamua i le (1.6%), ua faailoa o se amataga fou lea mo Samoa ma ona tagatānuu.
Ae lē na’o le pau ai lea o loo faailoa foi fesoasoani a le Faletupe o le lalolagi (World Bank) E $7,084,762 faapitoa lava mo le Korona Vairusi i lalo o le fesoasoani (IPF-COVID19) e ese mai le $14,443,3090 o se teugatupe mo faalavelave Tutupu Faafuase’i (CatDDO) lea sa tuuina muamua mai se vaega i le Tala Faaopoopo Muamua o le tupe mo le Misela ia Tesema 2019.
O le faletupe o Atina’e a Asia (ADB) o le teugatupe mo faalavelave tutupu faafuase’i (Contingency Disaster Facility) e $8,218,324 o lea vaega tupe e tutusa ma le teugatupe o loo faia e le Malo i lalo o le Faletupe o le Lalolagi (CatDDO) ma o se fesoasoani mo faalavelave faalenatura mo paaga a le ADB ae ua maua foi le avanoa e saofagā ai faama’i pipisi e pei o le KOVITI-19. Ua faailoa o se avanoa lelei foi lea mo Samoa e tapenapena ai auā puipuiga mai faama’i pipisi, aemaise o sauniuniga moomia ina ne’i aafia Samoa i le Vairusi.
E $9,080,553SAT le fesoasoani a le malo o Niu Sila e ui o loo tele lona aafiaga i le faama’i lenei nai lo Samoa ae ua aapa mai e ala i lenei seleni e fesoasoani mai ai i le atunuu. O le malo o Iapani o loo faimeaalofa mai i masini e tusa lona tau ma le $1,822,374.
[/et_pb_text][/et_pb_column][/et_pb_row][/et_pb_section]
