Tausala Samoa ma le Pasefika, o loo faia lana galuega i le faiga o tuiga a le fanau

O le lua aso lea na tapunia ai uma galuega ma pisinisi, ae faagasolo le tuiga tele a le atunuu, na maua ai nisi o aiga e lei faia ni tuiga, o nisi o le fanauiti, e pei la o se tasi i Vaitele o Malia Uili, lea na ia faaalia e toafā e lei faia o latou tui. O le mafuaaga o le pisi ma le faigata o feoaiga.
O le tama matua a lea tamaitai e 25 tausaga le matua o lana tama laititi e na o le 5 tausaga le matua. Ae taunuu atu ua mae’a ona fai o la tui ma lona toalua.
O lana faamatalaga o laua na o e faatau ae fetaui ma le van a le falema’i, ona taofi lea o laua ae fai o la tuipuipui o le misela, ae faatali le la fanau se’i oo atu le faasologa o tuipuipui.
O le toalua o le fanau e toafā a Malia, ua uma ona fai tuipuipui mai i aso o laiti, ae o le isi toalua e lei faia. O le maliliu o tamaiti i le faama’i o le misela ua faapopoleina ai le tina lea ma lona aiga, ma e lei malamalama lelei le taeao, ae ua leva ona faatalitali mai le taunuu atu o taavale e fai ai tuiga.
Ae na faaalia e le tina o lana fanau e toalua e lei tuiina lea e aofia ai le 5 tausaga e matua, o le utiuti lava o le faasoa i isi aso e ala ai ona le avea e fai tui, e lē gata i lea o le faigata o auala o feoaiga, ma e na’o lona toalua e faigaluega, e lē taitai ona lava lona totogi mo le tausiga o lona aiga.
Ina ua fesiligai pe na ia silafia faasalalauga ma lapataiga mai i le Matagaluega o le Soifua Maloloina i le tāua o le fai o tuipuipui o le fanau ae na tali ioe, peitai o le utiuti lava o le faasoa.
“Sa fai o la aso o omai i tua teine foma’i e mafai lava ona savavali i ai e ave tamaiti e fai o latou tui, ia ae o lea ua taofi mai, ma ua faigata foi mo matou”. O le isi aiga e ese foi latou faamatalaga.
E pei la o le aiga o le au aiga a le au Hastings i Vaitele, lea e oo atu e toalua tamaiti ta’i 8 ma le 9 tausaga e lei faia ni tuipuipui. O le faamatalaga a le tina lea, na uma lelei tui a lana fanau, ae o le mea lea e manao ai pe talafeagai ona toe fai nisi tui o lana fanau ona ua matuā popole lava i le faama’i.
“Na ou fesili muamua i foma’i pe talafeagai ae fai mai e talafegai, lea ua ou manao e fai, e aooga la’u fanau i le Robert Louis Stevenson, ma na amata loa ona aafia Samoa i le mise’a taofi loa ma la’u fanau mai i le aoga.”
“O lea la faatoa ou mafanafana ua uma ona toe fai tuipuipui a si a’u fanau.” Ae iai foi isi aiga na maua atu, e mumusu e fai tuipuipui. Na faamauina i le saunoaga a le faauluuluga o le Komiti mo faalavelave faafuasei, Ulu Bismarck Crawley, e na te lē iloa pe aisea e mumusu ai e fai tuipuipui.
Ae e tāua lava le fai o tuipuipui mo tagata uma. Saunoa Ulu, o le tagata e toatasi lea na sau ma aumai le faama’i lea ua pepesi ai le faama’i i Samoa.
O lona uiga e lē faapea e mananao isi e fai tui ona o puipuiga ae mumusu le isi vaega e fai, ma e ono toe pepesi ai le faama’i.
O loo manino lelei le saunoaga a le Palemia talu ai nei, o le tauaofia o le Palemene Aoao o Samoa i le aso 18 o le masina nei, o le a faaulu ai le Pili e faatulafonoina ai tagata uma e tatau ona fai tuipuipui. Ma o le a faia i sona tulaga faanatinati.
O lona uiga e matuā leai ma se isi e lē tatau ona alo ese mai i le tulafono.