EFKS Pakuranga sa tatalaina pesepesega o le 13 Aso o le Kerisimasi i le EFKS Puaseisei Magele Sasae

O le faamoemoe maualuga lava o le susuga i le faafeagaiga ia Rev Victor Pouesi ma le faletua ia Salome ma le ekalesia EFKS Puaseisei Magele Sasae o le 13 aso o pesepesega o le Kirisimasi, o le taumafai lava ia tulituli aupu le faamoemoe o le agaga moni o le Kirisimasi, ae manatu foi o le pito laau tauave moni lea a ekalesia uma lava, e lē na o le EFKS Puaseisei ae o le matafaioi uma lea a kerisiano, ma aiga lolotu uma lava ina ia faatāua le itu faaleagaga o le Kirisimasni.
A silasila i ai i le saoasaoa o nei aso ma ala faatekenolosi, aemaise foi o le toso e le lalolagi o le agaga o le Kirisimasi e pei ua fai ma aso e faatau ai a latou oloa ma faatāua ai le itu i le tino. E lē o se mea leaga ae pei e foliga mai ua mamafa pito tasi ma agai atu ai ina faasolo ina leiloa ma malemo atu ai le agaga moni faaleagaga o le kirisimasi o le fanau mai o le faaolataga. O le vaega e pito sili ona tāua ia faaolaina i tatou ia Iesu Keriso.
O le tausaga nei, ua ese ai ona tapenaga mai le tele o isi tausaga ua mavae talu ona faagasolo mai lenei polokalame.
O le tausaga muamua lenei ua lē mafai ai ona faafiafia le ekalesia EFKS Puaseisei i Magele i Sasae o loo faatinoina lenei faamoemoe, ona o le finagalo o le susuga i le faafeagaiga ma le faletua faapea le ekalesia, ia tuuina atu le avanoa i nisi o le tele o ekalesia o loo taumafai mai ni avanoa e faafiafia ai i le faamanatuina o le 13 aso.
Ua lava latou i le 10 tausaga ua mavae ae faasafua atu le avanoa i nisi o ekalesia. O le taimi muamua lenei ua malaga mai ai se ekalesia mai le motu tele o Savaii e pei ona auai mai ai le ekalesia EFKS Fusi Safotulafai e taualugaina le faamoemoe o le 13 aso i lenei tausaga.
O le isi suiga fou i lenei tausaga, ua mafai ona ofi mai ai le sa o aoga i totonu o le polokalame. O le mafutaga a tama ma teine tuai o Avele le ACOPA lea faatoa mae’a le faamanatuina o lona 95 tausaga, o latou ia ua tatalaina le avanoa o aoga e pepese ai i le faamanatuina o le 13 aso, lea ua tuu i ai le faatafiti o le polokalame.
Saunoa le susuga i le faafeagaiga ia Rev Victor Pouesi e tele nisi o aoga sa faatō’ai atu e fia auai, ae peitai ua tumu le polokalame i lenei tausaga lea ua iai le faamoemoe i le tausaga fou ma nisi o polokalame i le lumanai o le a auai loa nisi o aoga.
O le tausaga nei foi ua lē mafai ai ona faataunuuina le faamoemoe o le 13 aso i Samoa e pei ona masani ai i tausaga taitasi, ae o lea ua fai ai le ekalesia EFKS Puaseisei i Magele Sasae ma avefeau o le talalelei o le Kirisimasi i lenei tausaga 2019 e momoli laau i fogaa e sulaina ai le alofa ma le agalelei o le Atua mo ona tagata Kerisiano.s
O le po ananei aso 9 o Tesema ua sauni ai le ekalesia EFKS Pakuranga i lalo o le taitaiga a le susuga i le faafeagaiga ia Rev Elder Vaaelua Patu ma le faletua ia Nila e tatala aloaia le 13 aso o pesepesega o le Kirisimasi i lenei tausaga 2019.
E tele nisi o ekalesia o lea ua atofaina i aso taitasi e pesepese ai ma momoli le feau o le talalelei, ae taualuga ai i le ekaleisa EFKS Fusi Safotulafai.