E toatasi se alii e galue i le uafu i Apia na faamautu mai ananafi e le Falemai tele i Motootua ua uma lona ola ona o le faalavelave lea na tulai mai ua mu ai se tane suauu i luga o le uafu.
O le aso ananafi (Aso Gafua, 4 Aperila 2016) a o lei taina le 12 i le aoauli, na faalogoina ai le pāpā mai o tane o loo teuina ai le suauu i luga o le uafu i Apia ma e lei umi ae sasao ane loa le afi e alu lava le aoauli ma le afiafi o tau tapē e le tineimu i Apia.
O se vaaiga na vave ai ona faata‘ape le aufaigaluega a le Malo mai i Matautu e oo i Sogi ona o popolega talu ai o tane suauu i luga o le uafu, e ta‘i mai i paipa agai i le nofoaga autu o le kamupani o loo aumaia le suauu i Samoa, le PPS lea e faamautu i Sogi.
Sa sau tala muamua o le faalavelave faapea o le tane lea na mu o se tane e teu ai le suauu popo auā le faatau atu i fafo, ae o le tala a le ofisa o le tiute e lē moni lea lipoti auā o le tane lea o loo teu ai le suauu lea e aumai i fafo ma ua faatau mai e le kamupani o le PPS.
O isi tane e lua e teu ai le Diesel ma le Petrol na taumafai i le aso atoa le tineimu ina ia faasao mai e ala i le fui faasolo atoa ma taumafai e aveese nisi o suauu mai ia tane nei afaina foi.
O le faamatalaga na maua ananafi, o se alii sa agai e faatino se galuega o le ueloina o le tane lea na mafua mai ai lenei afi. Ma o ia foi lea ua maliu i lea faalavelave. Ua faapea mai foi lipoti e iai se isi alii na o la galulue faatasi o loo taofia lava i le falemai ma o loo i se tulaga tigaina.
O le isi toafā na taofia ai lava ananafi o sui o le tineimu na faapea ona mānavaina le asu lea na ufitia uma ai le nofoaga o le uafu ma luga ane o le taulaga o Apia ma e toatasi na toe tea i tua i le Aso Gafua ananafi lea ae e toatolu o loo taofia pea mo togafitiga.
O se tasi lenei o mu tele ua tulai mai i le atunuu ma sa lapataia aiga o loo nonofo amata atu i Matautu seia paia Sogi ina ia agai ese ma lenei nofoaga ona o le ono aafia ai o lo latou saogalemu.
Na taofia galuega a le Malo i ona ofisa mai i Matautu seia oo lava i Sogi ona o popolega i pāpā ma paipa ia e ta‘i mai ai le suauu ma e mu atoa ai le taulaga pe a lē mafai ona tineia le afi na umi tele ona sasao.
E oo foi i aoga na vave tuua uma i lea aso ma faatonuina mātua ina ia piki uma fanau mai aoga ona ua lē faatagaina se tamaitiiti aoaoga ona agai mai i tai i le nofoaga e faatali ai pasi. Na matauina foi le aveesea uma o vaa sa taula i le uafu ona o le tulaga o le malosi o le sasao ane o le afi.
O le afiafi lava e tusa ma le ta o le fā (4pm) i le afiafi ae faatoa vaaia loa ua uma le asu na sau i le tane suauu lea e tasi ae na umi lava ona iai fuimu, leoleo faapea ai ma sui o le falemai tele i le uafu auā le faamautinoa ua mate le mu lenei.
