Na amata lenei mataupu ona o se lipoti a le TV One i Apia i le a‘e mai ai o malologa o le Eseta faapea o se tamaitai talavou ua vaaia ai faailoga o puapuaga o le alii Faaola o Iesu i le taimi o lona faasatauroina.
O se tala sa iai lea tamaitai ma ia faatino ai Iesu na vaaia ai le sau o le palapala ma ni faailoga ae lē o ni manu‘a i ona lima ma ona vae e pei o vaaiga o vaega o le tino o Iesu ia na tutu‘i i fafo ma e oo i lona ulu lea na tuu ai le pale tuitui na vaaia ai foi maosiosia ma le sau ai o le palapala.
O lona itu na vaaia le sau ai foi o le palapala. Na tuufaatasi vaaiga nei ma se ata na pue o le tala na faia i le EFKS a Siufaga i Falelatai i le Aso Maliu ma vaaia ai foi le palapala lava lea na sau i vaega ia o le tino ma vae o lea tamaitai e foliga mai o ni manu‘a ua maosiosia uma ma ua sau ai foi le palapala.
Talu mai lea lipoti e lē o nofonofo le toatele ua faaali ai o latou finagalo ma e matuā vaeluaina le atunuu ma ua oo lava i nisi o taitailotu ua faaali o latou manatu, o nisi ua talitonu o se vavega ma o se feau ua aumai e le Atua i tagata o Samoa e pei ona ta‘ua e lenei tamaitai o Toaipuapuaga Opapo faapea ua mate le faatuatua o tagata Samoa e amata mai lava i ona taitai seia oo i le fanau. O le feau tele lea ua unaia i lenei faaaliga i le manatu o lenei tamaitai.
Na logotala loa taitai o le Ekalesia Katoliko i Samoa i lenei lipoti na fesootai loa i mātua o lenei tamaitai le susuga i le faafeagaiga ia Rev. Opapo Oeti Soana‘i ma le faletua ia Luisa Soana‘i mo se taimi ma lea tamaitai, ma o le molimau foi lea a lona tamā e faigata tele vaaiga o le Aso Maliu ma le finauga ua faia i lona mafaufau o se faifeau o le Ekalesia Faapotopotoga Kerisiano Samoa ae ua tulai mai i lona afafine nei vaaiga.
Ona pau lava lana gaioiga na ia ta‘ua na faia, o le faalogo i le faamatalaga a lona afafine ma taumafai e tatalo mo se faamalamalamaga ma ua manatu le susuga i le Faafeagaiga, o se faaaliga ua faia e le Atua i lona afafine ma ua faapea foi ona tatalo mo le saogalemu o Toaipuapuaga.
O le mau foi lea a le toatele e oo lava i le taitai o le Ekalesia Katoliko i Samoa ma taitai o le Ekalesia Katoliko ona o se tasi lea o vaega malosi o le talitonuga Katoliko o faaaliga ua vaaia i tagata mai i le Atua.
O le mau lea ua faaigoaina ai tagata faapea o Stigmata ae mo le talitonuga EFKS ma isi Ekalesia Lotu o loo finau lava ma le manatu e mafai foi ona vaaia tulaga nei ia i latou ua faapea ona ulufia e le tiapolo ma ua tele le mau faamatalaga ua faia faapea ua tele tausaga o feaveai ma‘i o lenei teine talavou ma e foliga mai o ni ma‘i aitu.
Ua iai faamatalaga mamafa ua lafo i luga o le facebook e faatatau i lenei vaaiga ma i latou foi ua tulai mai ma finauina le tulaga lea o se vavega lenei ua faia ma ua faaamuia i lenei teine talavou i le mafai ona ia vaaia nei tulaga ma le fesootaiga i le Atua poo Iesu foi e pei ona ia faamatala ai i se sauniga tele na faia i le Malumalu Katoliko i Mulivai i le po o le Aso Faraile.
Ua iai lapataiga ua sau i nisi taitai o lotu ma faapea mai e tatau lava ona toe foi tagata Samoa i le Tusi Paia poo le ā le tali ma le sa‘o o nei vaaiga ma ua faaauau finauga e oo mai i le taimi nei.
E oo mai lava i le aso ananafi o faaalia e le aiga o lea tamaitai o loo vaaia pea le fai lava ma tulai mai o nei vaaiga ma e fai lava ma vaaia le sau o le palapala i vaega e pei ona ta‘ua i le tino o lea tamaitai.
Poo ā lava finagalo faaalia i lenei mataupu, ae mo tusitala lava latou, o se mataupu ua aafia uma ai le atunuu, ua vaeluaina ai manatu ae o lipoti lava ia ua alu atu i vaaiga o loo molimauina e oo mai i le taimi nei.
Silasila ane i itulau 7 – 9 o loo iai se auiliiliga o faamatalaga mai lenei tamaitai faapea foi i lona tamā le susuga i le faifeau, e tusa ai ma le amataga mai ma le faagasologa o le soifuaga o lenei tamaitai ma le gasegase ua leva ona aafia ai, seia oo mai i le vaitaimi ua lalata i le Aso Maliu na se‘i faatoa mavae atu nei, lea na tulai mai ai ni vaaiga ogaoga i le tino o lenei tamaitai talavou.
