(otootoga mai talafou)
Ua toalua nei i le alii o Timoteo Leota Mamoe ua 51 tausaga o lona matua nisi ua molia i le faaleagaina o le tagavai poo le Fu‘a o le Malo Tutoatasi o Samoa. A o lumanai le faailogaina o le 51 tausaga o le tutoatasi o Samoa i le faaiuga o le vaiaso ua mavae, ae osofai e Timoteo le Fu‘a o loo agiagia i luma maota o le Malo i le eleele fou i aso taitasi.
O ananafi na tulai ai lea taulealea matua i le faamasinoga faaitumalo peitai e lei tuuina atu sana tali i lona moliaga ona ua talia e lea faamasinoga le talosaga a leoleo e tolopo i le aso 11 o Iuni se‘i faamae‘a suesuega, ma tuuina atu moliaga o Timoteo i le faamasinoga maualuga.
E lē o manino lelei faamatalaga i le mafuaaga o le gaioiga a lea alii na ia tagofia ai se tamai agaese e faapea o se naifi faamoe ma ia faatamaia ai le Fu‘a o le meatotino faapelepele a le atunuu ma le Malo e tausia lelei i tiutefai o alii ma tamaitai leoleo.
O loo nofo taofia pea Timoteo i le vaaiga a leoleo e faatali ai le toe valaauina o lona moliaga. O se isi taulealea talavou sa ia susunu foi le Fu‘a i se gaioiga na ia faia i le tausaga ua mavae, ma o le Fu‘a lava i luma Maota o le Malo na afaina ai, ma sa molia foi e leoleo ma faia lona faamasinoga.
