‘O le tiute o pulenuu o le faafilemu o Nuu,’…Palemia

O le saunoaga lea a le Alii Palemia o Samoa, le Susuga Tuilaepa Lupesoliai Sailele Malielegaoi ina ua tulai mai se faalavelave i le afioaga o Fagalii ma le afioaga o Moataa i le taimi tonu o le tutoatasi.
O se vevesi i le va o taulelea o afioaga e lua ma na ta‘ua e i latou na molimauina ia tau‘aigamaa, na muamua lava agai ane ni taulelea mai Moataa ma o latou tau‘ai se fale i Fagalii. Mulimuli ane i lea lava aso na tulai mai ai lea feeseeseaiga na toe tali ane ai ni taulelea o le afioaga o Fagalii ma o latou tau‘ai foi se fale i Moataa.
O se vevesi na agai i ai Leoleo peitai na taei uma ai le pito i luma o le tioata o se sipi a Leoleo. E malama ane le taeao ua tau lē mafai ona feoai taavale i le sa‘oga lea e sau mai i Vaivase-tai seia oo i Moataa i le tele o le maa ua paepae i luga o le alatele.
Na na toe o ane lava nai aiga i autafa ma faamamā ese lea vaaiga ae e toavalu lava alii mai i afioaga e lua na taofia e leoleo ma o le asē e tatau ona tulai uma ai i luma o le faamasinoga e tali i moliaga o le faaleaga o meatotino ma le tau‘ai maa.
Faaali e le Alii Palemia, o ituaiga vevesi nei e tatau ona tulai malosi mai pulega a alii ma faipule latou te taofia, ae ua taatele lava e pei foi ona vaaia i le vevesi na tulai mai i le tausaga ua tea i le va o taulelea i Vaigaga, Vaitele ma Toamua, lea foi na matuā faigata ona feoai ai taavale e agai atu ma agai mai i le taulaga ona o le ati o pa maa ma le faalavelave o taulelea i pasi ma taavale feoai.
O le faamatalaga a le alii Palemia o le matafaioi lea a le sui o le malo i totonu o afioaga, o le pulenuu, o le talo o feiloaiga ma faafilemu tupulaga i le tulai mai ai o nei faafitauli. O lea ua ta‘ua le mae‘a feiloai o matai o afioaga e lua ma e lē o toe iai la i le taimi lenei se faafitauli o toe tulai mai ma ua tuu atu lava foi le mataupu lenei e feagai ma le matagaluega o Leoleo aemaise le faamasinoga lea e tulai ai i lenei vaiaso nei taulelea.
O loo faafetai foi le Matagaluega o Leoleo ona o le leai o nisi na afaina ai se soifua i lenei vevesi ma ua oo foi le matagaluega i faiganuu e lua ina ia soalaupule nisi auala e taumafai ai e aua ne‘i faaauau nei vevesi e tulai mai.
O le afioaga foi o Matautu i Apia lea foi na tulai mai ni vevesi na ave uma ai e leoleo matai ma taulelea i le lua tausaga na tea nei ona o vevesi ma taulelea o Apia ma e tele ofisa ma pisinisi na aafia ai i tau‘aiga maa ona o lea feeseeseaiga.