“A mafai ona latou fausia se faletalimalo e lua ni potu, ua ou matuā fiafia tele”..Palemia
E maoa‘e ni taumafaiga tau i le atina‘e o le tamaoaiga o Samoa ua faailoa e se aufaipisinisi mai Saina o le a latou fausia pe a talia e le Malo nisi o o latou manaoga ua faailoa i se talosaga tusitusia ua ave i le Malo o Samoa.
O lea aufaipisinisi e ta‘ua o le Beijing Zhddfdcao Yi Li Investment Management Co Ltd sa asiasi mai i Samoa i le lua vaiaso ua mavae, ma latou asia ai nisi o vaega o Upolu faapea ai foi ma le motu o Savaii, ona o le fia silasila pe iai ni nofoaga lelei ma talafeagai e fausia ai a latou atinae.
O se fuafuaga ua masua mai ai i fafo le tele o lagona faitio o le atunuu ona o le lisi o fuafuaga a lea aufaipisinisi poo se kamupani foi, ua aliali ai ma nisi o manaoga ua latou tatalo ai i le Malo e faamatuu atu. E fia aumai i Samoa le tolu sefulu afe o tagata mai Saina e galulue i le fausia o ia atinae ma faigaluega ai mo le umi e tolu tausaga.
E mananao foi e lisi atu ni eleele mo le umi e 160 tausaga. E fia maua le sefululima tausaga e lē totogia ai ni a latou lafoga mo oloa e faaulufale i Samoa mo le faatinoina o a latou atinae tau pisinisi.
E mananao foi e fau ni alatetele e agai i ia atinae e faaaogā ai le gagana Saina ma le gagana Samoa e faasino ai tagata i vaega o le a iai ia pisinisi.
O se faletupe, se faletalimalo ma se kasino, ma se kamupani vaalele o nisi ia o atinae tetele ua faailoa e lea kamupani o le a latou fausia pe a talia e le Malo o Samoa o latou manaoga ua ave i ai.
Ua masani le alii Palemia i folafolaga ma manaoga o kamupani mai fafo ma tagata faipisinisi e fia o mai i Samoa e faafaigaluega ai a latou tupe i le faatutū ai o ni a latou atinae tau pisinisi. O lana saunoaga lea i tusitala ina ua fesiligia e faatatatau i le kamupani mai Saina.
Saunoa ai Tuilaepa e lē vave faia i ai se faamatalaga a le Malo i le kamupani lea mai Saina ma a latou folafolaga ma manaoga, ona na faaalia e le Palemia ua tuanai atu foi nisi aufaipisinisi mai fafo na latou faailoa o le a fau lea atinae ma lea atinae, ae na uma loa ona folafola mai ninimo atu lava ma agai ese ma Samoa e lei toe vaaia.
E pei e te‘i le faafofoga ma le silasila a le toatele i ni manaoga ua tuuina atu i le Malo e se kamupani mai Saina, e lē gata ina tele le mau atinae o le a latou aumai ae tele foi ma manaoga, ae o ni manaoga fai mai se isi faipule o le Palemene seiloga o Tui valea uma o loo taitaia le malo ona matuu gofie lea i ni manaoga faapea.
Ua malaga ese ma Samoa sui o lea kamupani mai Saina e faapea sa malaga faatasi mai ma le Konesula o Samoa i lea atunuu le afioga Toomata Terry Toomata. E lei manuia sailiga mo se finagalo o le Konesula e faatatau i lea aufaipisinisi mai Saina.
