(otootoga mai talafou)
Ua toe faafaigaluega nei e le Malo i le Matagaluega o Leoleo ma Falepuipui, se tasi o tamalii sa avea ma komesina lagolago o le matagaluega o leoleo, ae e lei toe faafouina lana konekarate i le mae‘a o lana tolu tausaga i lea tofiga, le afioga Leaupepe Fatu Pula.
Ua avea nei o ia ma ofisa mo faamatalaga e aoina mai le atunuu poo le public information officer, mo le matagaluega o leoleo e pei ona faailoa mai e se tasi o leoleo sinia sa fesootai atu ai.
O le vaega o auaunaga lautele le general policing ua iai se potu ua avea ma ofisa o lea tamalii, ma e lei manuia sailiga i le fia maua o sona finagalo i lana pitolaau ua galue ai nei, ua lē o se leoleo ae o se tagata faigaluega faaofisa sivili, ma e feololo lona totogi ua tuu i ai, e faapea mai se molimau faatuatuaina e 50 afe i le tausaga, faatusa i le 80 afe sa ia maua i le tausaga a o avea ma se tasi o komesina lagolago.
O le lē toe filifilia o Leaupepe Fatu Pula i le tulaga komesina lagolago, e lei taofia ai lona fia galue pea i le matagaluega mo se isi auaunaga e mafai ona tautua ai i le Malo, lea na tuuina atu ai se fautuaga i le Kapeneta mo le fausia o se tofiga talafeagai ma lona tomai faaleoleo e pei ona sa galue ai i le tele o tausaga.
E tolu tausaga o le konekarate ua galue ai nei lea tamalii i sona tofiga fou i le Matagaluega o Leoleo ma Falepuipui.
