O se talafaasolopito lenei talu ona faagasolo mai le tauvaga pese lauiloa a le fale televise o le TV1 Samoa i totonu o le atunuu, ina ua toalua ni sui ua manumalo ai i le tauvaga o lenei tausaga. O le tausaga lenei e atoa iai le 15 o tausaga talu ona faatamo’e mai ai e le TV1 Samoa lenei tauvaga pese ma le naunautaiga e faalauiloa atili ai le atina’eina o taleni pese a fanau o Samoa.
I le Samoa Star Search i le tausaga lenei e silia ma le 60 alo ma fanau a Samoa na resitala mai ai i le amataga peitai e na’o le 20 i latou na mafai ona filifilia e faamasino e faagasolo ai lenei tauvaga. E 16 vaiaso atoa na tausinio ai i latou nei e 20 seia oo mai i le sailiga siamupini i le vaiaso na tea nei lea e na’o le toalima i latou na tauva ai e aofia ai le tamaitai talavou ia Tagiilima Fiti mai i le afioaga o Siusega ma Laulii, Netasarafina mai Satupaitea i Savaii, Nissan Aitui mai Salailua Savaii, James Vito mai Lotopa ma Michael Westerlund mai Siumu.
E lua ituaiga pese na tausinio ai i latou nei e toalima i le po o le aso toonai na tea nei, o le pese Samoa ma le pese palagi e filifili lava e le sui tauva. Na tulaga ese ma maualuga lenei tausaga pe a fua atu i le tau fai finau uma o nei sui e toalima, peitai na tu maualuga lava sui e toalua mai i le kolisi maualuga o Leifiifi i Malifa, le tamaitai o Tagiilima Fiti ma James Vito.
I le faaiuga a faamasino e toafa na sili ai togi o Tagiilima Fiti ia James Vito i le pese Samoa, ae i le pese palagi na manumalo ai James Vito. I le tuufaatasiga atoa o togi o lea po na faailoa mai ai le tutusa o i latou nei e toalua i le tulaga muamua. O lona uiga ua toalua ai fetu o lenei tausaga i le sailiga fetu a Samoa poo le polokalame o le Samoa Star Search 2018.
O se faaiuga ua manatu ai le laulau a faamasino ua matua taafeauga lelei e ui na iai foi le gugulu o nisi i luga o le facebook, e faapea sa tatau lava ona tasi le manumalo. O le isi faailoga faapitoa na tolaulau ai i lea po, o le faailoga lea mo le sui tauva na aupito sili ona toatele tagata na palota iai, poo le People’s Choice Award, lea na faapaleina ai le susuga ia James Vito.
Na taulia uma pepa matamata o lea sailiga siamupini i le toatele o tagata na lolofi atu e fia molimauina poo ai a sola ma le manumalo o lenei tausaga i le Samoa Star Search, faatasi ai ma le tele o nisi o faafiafiaga e aofia ai le fetu a Samoa i le tausaga na tea nei le susuga ia Martin Mose mai Saleimoa, o le ausiva a le Samoa Toa lea na malaga atu ma tausinio ai i le tauvaga siva hip hop a le lalolagi i Amerika, aemaise lava o le aufaipese logologoa a le Punialavaa lea na aumaia faapitoa ai e le TV1 mai Niu Sila e faafiafia ai i le Samoa Star Search o lenei tausaga.
O le Afioga i le alii Palemia, le susuga ia Tuilaepa Sailele Malielegaoi na saunoa e tatala aloaia lenei faamoemoe, a’o le lauga faapitoa o lea po, na saunoa iai le na manumalo ai i le Samoa Star Search i le tausaga na tea nei le susuga ia Martin Mose.
O le faailoga o le manumalo e aofia ai le tele o pepa tala oloa mai pisinisi i le atunuu, o pepa e malaga fua ai i Niu Sila ma le faailoga tupe e $6000.00.
O le manumalo ai o sui e toalua i le Samoa Star Search o lenei tausaga, ua faamauina ai o le uluai tausaga lenei ua toalua ai nisi ua mafai ona tutusa i le tulaga muamua talu ona faafoe mai lenei polokalame pese.
O le polokalame lenei o le Samoa Star Search ua toatele nisi o alo ma fanau pepese a Samoa ua fai nei a latou cd pese ae na amata pepese ma faalauiloa mai i le polokalame lenei i luga o le Televise Samoa.
