E toalima i latou e aofia le afioga i le Palemia susuga Tuilaepa L Sailele Malielegaoi, o le Loia sili a le Malo le afioga Lemalu Herman Retzlaff, o le tasi o tamalii sa avea ma Loia sili le afioga Aumua Ming Leung Wai, o le matagaluega o punaoa faalenatura ma le siosiomaga ma le faalapotopotoga o eleele o Samoa, o loo faasaga iai le tagi o se su a le faalapotopotoga oni tagata Samoa ua ta’ua o le Samoa Solidarity International-Global le SSIG.
O lea tagi e mafua i le tulafono o le lesitalaina o fanua na pasia e le palemene i le tausaga e 2008 ma ua faailoa lautele le auiliiliga o lea tagi ma faailoa ai foi e lima miliona se vaegatupe o loo tatalo le itu talosaga e totogi atu e le Malo ona o lea tulafono.
Ua latou tuuaia e soli faavae lea tulafono ma ua oia ai aia tatau o tagata Samoa e iai le pule o fanua faaleaganuu.
E ono mau autu poo causes of actions o loo finauina i le su ma o le faaiuga o le vaiaso ua mavae na faaulu ai i le faamasinoga lenei mataupu.
Ua tatalo le Itu tagi i le faamasinoga mo le faia o se faaiuga e olopala ai le tulafono ma ia toe faafoi eleele faaleaganuu i suli o aiga e ana ia fanua ua maea ona lisi i lalo o aiaiga o lea tulafono.
O loo faapea mai foi se tasi o mau a le itu tagi sa tatau ona faia se palota lautele poo se referendum e saili ai finagalo o le atunuu ao lei fausia le tulafono e lesitala ai fanua faaleaganuu.
I se pepa o faamatalaga ua faaalia ai o loo finauina foi i le talosaga poo le su ua faaulu i le faamasinoga le afaina o le vaega 102 ma le 109 o le tulafono faavae o le Malo o Samoa.
Peitai e pei ona silafia o le fesiligia pea o le taitai o le Malo i nisi o feiloaiga ma tusitala i le mataupu i eleele faaleaganuu sa ia faaalia ai e lē o aafia le vaega 102 o le faavae, ona o loo tapu ma faasa ona faatau ese ai fanua faaleaganuu.
O le SSIG poo se mafutaga o tagata Samoa i le lalolagi o loo tutu e tetee le lesitalaina o fanua faaleaganuu sa faia ni a latou solo tetee ini masina e lei mamao tele atu sa folasia ai le latou mau.
E lei mautu se aso e valaau ai lenei mataupu i le faamasinoga maualuga.
