Aumalaga matagaluega Aua i Amerika Samoa

Aumalaga matagaluega Aua i Amerika Samoa

E 64 le aumalaga toatele mai le matagaluega a Maria Fatima i Aua i Amerika Samoa o loo iai i totonu o Aotearoa e ala i ana polokalame faaevagelia faaleagaga faatasi ai ma le latou soofaatasi ma le Ekalesia Katoliko i Grey Lynn.

O le aso 17 o Aokuso na taunuu mai ai le malaga i Aukilani, ae o le Aso Sa na sosoo ai 19 o Aokuso na amata aloaia ai loa a latou polokalame faaleagaga i le ekalesia poo le malumalu o le Ekalesia Katoliko i Grey Lynn. Na molimauina le toatele o aiga lotu mai isi Ekalesia Katoliko faapea uo ma ē masani sa tumutumu ai i lea malumalu e maimoaina le matagofie o polokalame o le aumalaga mai Tutuila.  Na amata le sauniga i le taulaga o le Misasa Paia na ta’ita’iina e le Atiepikopo ia Mata’eliga, ma o le aufaipese mai Tutuila sa latou lagiina viiga o le Atua i lea taeao. Na mae’a le Misasa ona tuu loa lea o le avanoa e faasoa ma tufa mai ai le aumalaga e ala ia latou tapenaga sa malaga mai ai.

Na mālie i le faafofoga a le mamalu o le atunuu pesega faapea siva faitaga faaleagaga sa momoli mai ai ni feau tāua o le ola tautua ma le ola ofoina atu o le tagata mo le Atua ma lana galuega. Ua le gata o se luitau mo aiga ma matua, ao se fafagu foi mo tupulaga talavou i le faaaogāina o soifua o talavou mo le Atua ma lona finagalo, auā o le ‘afa o le aumalaga, e toatele lava o fanau talavou. Na mae’a le sauniga ona sosoo lea ma le ‘ava o le feiloaiga na saunia e alo ma tamafanau o le Ekalesia Katoliko i Grey Lynn ma faaauau ai le mafutaga i le toonai.  O le ekalesia i Kingsland o le tasi lea aulotu na agai iai polokalame a le aumalaga, ona o le naunautaiga lava o le matagaluega mai Aua i Tutuila ia faaauau pea le galuega faasoo ma le galuega faatalalelei a le aumalaga na tuua ai aiga ma nuu faapea le ekalesia.

Akiepikopo Alapati Lui Mata’eliga ma susuga ma afioga i Patele sa taitaiina le sauniaga o le Misasa

Akiepikopo Alapati Lui Mata’eliga ma susuga ma afioga i Patele sa taitaiina le sauniaga o le Misasa

O le taimi muamua lea ua sau ai se malaga faapenei a le matagaluega a Aua i Aotearoa, ae na ta’ua e le ta’ita’i malaga ia Meleisa Filiga, ua tele se aogā ma le tāua o le galuega soofaatasi a le autalavou na malaga mai faapea le ekalesia i Grey Lynn, ua mafai ona toe faalautele ai viiga o le Atua ma pesepesega faaleagaga auā tapuaiga. E ui foi i le tau mai malaga o loo vevela le malulu i Niu Sila nei, ae o loo vaaia lava le alofa ma le agalelei o le Atua i le faigamalaga.

O loo lotolotoi foi i totonu o lenei faigamalaga le tāua o le aganuu a Samoa e pei ona iai le mafutaga a le matagaluega faapea le Taimua Youth, auā o le tasi lea vaega sili ona tāua i totonu o ekalesia, o le galuega fai faatasi a le talalelei a le Atua ma le aganuu a Samoa. O le Aso Lulu 22 o Aokuso na tuuvaa atu ai loa le malaga i Ueligitone i le toe faaauauina lea o a latou polokalame, i le Ekalesia Katoliko i Lower Hutt i le lima aso, ona toe taliu mai lea i Aukilani ma toe tapena ai le toe foi atu i Amerika Samoa.

O le galuega tautua i le Atua e le faigaofie ae sa mafai mea uma i tapenaga o le malaga ona o le faatasi mai o le Atua, o le saunoaga lea a le ta’ita’i malaga. E tasi le tausaga na fuafua mai ai lenei faamoemoe ma sa saili lava i lima pasese ma mea uma e faatino ai le malaga. Lea ua taunuu mai ma le manuia o le viiga lea o le Atua. O loo iai le faamoemoe a toe taliu i fanua le malaga ona toe fuafua lea o se isi malaga i le tausaga fou i le alofa o le Atua.