E tolu ni mataupu na tutupu mai i le vaiaso nei ua laga ai le toe faamanatu atu le tāua o le ta‘u o le sa‘o i pepa faatumu.
1. O le pepafanau o se tamaitiiti na liliu e se ulugalii mai Samoa i Samoa, o loo aumai lava le pepafanau fou o la lava e tusi ai se nuu sese i le vaega o loo tusia ai le mea na fanau ai le tamaitiiti. Tiga na iloa e le tina na liliuina le tamaititi o la e sese ma lē sa‘o ni lomiga i luga o le pepafanau fou, ae o loo faaaogā pea e lenei tina le pepafanau lē sa‘o e saili ai le sitiseni o le tamaitiiti i Niu Sila nei. O le a tatou talanoaina tulaga e ono oo i ai lenei tamaitiiti i le faaaogāina o se pepafanau lē sa‘o e mātua na liliuina mai.
2. Tiute o tagata o loo nonofo i fale o le malo, e ta‘u le sa‘o i le malo pe a faatumuina pepa mai le malo, aemaise lava pepa o loo fesiligia ai tupe maua (family income), ma ni fautuaga i ni auala e tatau ona e uia pe a e iloa na e faatumuina sese ni pepa na ave i le malo.
3. Tiute i le tulafono e ta‘u le sa‘o i tautoga i luga o le Tusi Paia (affidavits). E tāua tele lenei fautuaga auā o le tagata e tauto pepelo i le Tusi Paia, e oo i le 7 pe 14 tausaga e falepuipui ai, ma totogi le sala tupe, pe a faamaonia le tauto pepelo i le fale faamasino.
Talanoaina Lautele o Mataupu e Tolu ia e ta‘ua i luga:
• O se liliuga o se tamaitiiti sa fanau i Samoa o loo oo mai i le aso, o loo faaaogāina lava e le tina na liliuina mai le tamaitiiti se pepa fanau o loo iai ni faamaumauga lē sa‘o, e apalai ai pepa nofomau ma sitiseni o lenei tamaitiiti. Atonu e lē o tāua i lea tina le solitulafono o le mea lenei na te faia. Atonu foi e lē o ta‘ua ia i lea tina se afaina o lenei tamaitiiti i se taimi o lumanai talu ai faamaumauga sese i luga o le pepa fanau na aumai i Samoa, o loo iai ni mea sese, ae o loo faaaogāina lava e lenei tina lenei pepa fanau e oo mai i le taimi nei. O le fesili – o ai e lavelavea ai i le tulafono? I le taimi nei o mātua o le tamaitiiti pe a lipoti e se isi i le malo o Niu Sila o le pepafanau lea e faaaogā o loo iai ni faamaumauga sese, o loo iloa e le tina o le tamaitiiti, e sese i luga o le tulafono, ae o loo faaaogā lava. O matupu faapenei e lē o ni mataupu e faatamala i ai, auā e iu lava ina falepuipui ai le tagata lea na ia aveina pepa lē sa‘o i le malo, ma lona iloa e lē sa‘o tusitusiga la ei luga o le pepafanau. E telē foi le afāina o si tamaitiiti. E le gata i le molia e le malo o Niu Sila ia mātua i le tulafono ona ua faaaogāina se pepa lē sa‘o, ae tusa pe ua maua le sitiseni o lenei tamaitiiti i Niu Sila, e mafai e Niu Sila ona toe se‘i le sitiseni e lē faaaogāina. E tele foi le afaina o si nei tamaitiiti pe a matua, pe a maua ane o loo ona faaaogāina se pepa fanau ma lona iloa e sese ni lomiga o iai i lena pepafanau.
• Afai o e nofo i se fale o le malo, o le tasi o lou tiuite o le faatumuina sa‘o ma le faamaoni o pepa e lafo atu e le malo e te ta‘uina mai ai tali o fesili la ei luga o le pepa. O le tasi o vaega e sili ona tāua o fesili a le malo e tau i le tupe maua a le aiga (Income). E faamoemoe le malo i le tautala sa‘o o le tagata la e nofo i le fale o le malo, auā e faaaogā e le malo ia tusitusiga mai tenants poo latou o nonofo i fale o le malo, e seti ai le rent o le fale lea e faaaogā e le aiga. Pagā lea, o loo iai ni Samoa o loo molia e le malo i le taimi nei ona ua maua e le malo mai le Tax Department ia faamaumauga o galuega ma totogi, ua nanā e le tagata o loo nofo i le fale o le malo, ma le tusiina i lalo i le pepa, lea e ave i totonu i le malo. O le tele o pepa faatumu, e tatau ona e lauina, ma malamalama i ai ae e te lei saini lou suafa. E te sainia loa le pepa, o lau faamaoniga lena faaletulafono, e moni ma faamaoni mea ia na e tusia i luga o lena pepa. O latou nei o loo afaina i le taimi nei i solitulafono faapenei, e oo i le 7 tausaga e falepuipui ai, le faasalaga. Ae o le faigata ia ona tetee (defend) ona o loo iai faamaumauga a le malo mai i le Tax Department, e faaali e le loia a le malo, i le fale faamasino, tupe na maua e tagata, ae lē o faatumuina i pepa a le malo, lea e aumai e faatumu sa‘o atu, e latou o loo nonofo i le fale o le malo.
• PERJURY – O tagata uma e tauto pepelo i le Tusi Paia e 7 tausaga e falepuipui ai. Afai o le tautoga pepelo i le Tusi Paia sa faia ma le agaga e faaaogā le tautoga pepelo e molia ai se isi tagata i le moliaga i luga o le tulafono, e oo i le 14 tausaga e fale puipui ai, pe a faamaoni se tagi a lē ua faaleaga sese lona igoa. Afai o se tala pepelo na faia i luga o le tulafono “Declaration” e 5 tausaga e falepuipui ai, pe a faamaonia e le tagata lea e tagi, le pepelo o upu o le tautoga. E matuā faasā i le tulafono le faaleagaina e se tasi tagata le isi tagata ma fai ni upu lē sa‘o e faaleaga ai le tulaga ma le igoa o lena tagata i se tautoga i luga o le Tusi Paia, poo se tautoga i luga o le tulafono. (Declaration) O loo iai ni mataupu faapenei i le taimi nei ona o ni tuua‘iga ma ni tala pepelo ma taufaaleaga i luga o ni tautoga a ni Samoa i le Tusi Paia. E matuā mamafa lava faasalaga i mea faapenei, auā e puipui e le tulafono igoa lelei o tagata, ma o latou tulaga mai le taufaaleaga pepelo o e latou te faaaogāina sese tautoga, e fai ai a latou taufaaleaga.
O matuapu ia e ta‘ua i luga o mataupu o loo tutupu i le taimi nei. Atonu e aogā le talanoaina, e faamanatua atu ai i o tatou tagata le tāua o le ta‘u o le sa‘o aemaise tautoga i le Tusi Paia ma le tulafono.
