Ua toe faaauau ona faatino tiute faaloia o le afioga Tuala Joe Ponifasio, e pei ona lipotia ai e le upega tafailagi o le Talamua se faaiuga a le faamasinoga maualuga na fofogaina i le Aso Faraile na tea nei, 14 Fepuari 2013.
O le faaiuga lenei na mafua i se talosaga a le alii loia o Tuala na ave i le faamasinoga na fesiligia ai le faaiuga a le Sosaiete a Loia i Samoa na faia i le masina o Setema o le tausaga ua mavae, lea na toe faaauau ai lona faasalaga e faataatia mo se taimi lē tumau ona tofi faaloia.
O lea faaiuga a le sosaiete na faia ina ua tuanai ona lau le iuga a le faamasinoga o talosaga apili (court of appeal) na talia ai le talosaga a le alii loia faasaga i le suesueina o lona moliaga e le faamasinoga a le sosaiete a loia.
Na ioe le faamasinoga o talosaga apili e lei ausia le tulaga talafeagai ma le fetaui o le faatinoga o le faamasinoga e sui o le sosaiete na faatautaia, ma poloaina ai e faataatia ese le faaiuga na latou faasala ai le afioga Tuala.
Na fesiligia le failautusi o le sosaiete le tamaitai loia o Rosella Papalii i lea taimi pe o le a se gaioiga a le soaaiete o le a faatino talu ai lea faaiuga. O lana faamatalaga o le a toe saili nisi sui e faia le faamasinoga poo le Tribunal e toe suesue ai le tuua‘iga faasaga i le afioga Tuala Joe Ponifasio.
Peitai o le tuanai o le faaiuga a le faamasinoga o talosaga apili na faailoa ai e le alii loia ua faamamāina lona suafa mai le moliaga ma ua tatau ona toe maua ona tusi ma faailoga faaloia e faaauau ai ona tiute.
Peitai sa mau eseese le alii loia ma le sosaiete i le faauigaina o le faaiuga, ona sa faaalia e le komiti faatonu a le sosaiete, ua na o sui na faatautaia le faamasinoga o le alii loia ua faapea mai le iuga a le faamasinoga apili e tatau ona toe sui i nisi tagata, ae e lei soloia ai le iuga na latou faia, lea na faamalolo lē tumau ai tiute faaloia o Tuala mo le lua tausaga.
O le taunuuga o le finauga lenei na faaulu ai loa e le alii loia lana talosaga i le faamasinoga maualuga e fesiligia ai le iuga na faia e le faamasinoga o talosaga apili, ma le iuga na faia e le faamasinoga a le sosaiete. O le faaiuga la ua aumai o le toe faaauau o ona tiute faaloia.
E lei maua se finagalo o le failautusi o le sosaiete i le tulaga ua oo nei i ai le mataupu aemaise poo fea ua oo i ai le iuga a le faamasinoga apili na fofogaina i le tausaga ua mavae.
E lei maua se avanoa e fesiligia ai le afioga Tuala e tusa ai ma le faaiuga ua aumai, ae o le itu mautinoa ua toe galue nei ma faatino ana galuega faaloia.
