O le oso a‘e o le la i le taeao o le aso 11 o Fepuari 2013, na logo ai itu e fā o le lalolagi ina ua aumai le tala faalauaitele e faateia ai mai totonu o le nofoaga tutotonu o le Ekalesia Katoliko, le Vatikana i Roma, ma faalauiloa mai ai le faamavaega a le afioga i le Tama Paia, poo Pope Penitito XVI.
O se tala na momoli mai ai ma lagona faavauvau a le Ofisa Tutotonu o le Ekalesia Katoliko, aemaise o ona tagata lotu i soo se vaipanoa ma soo se atunuu o lenei lalolagi.
E toatele i latou na faigata ona taliaina lenei tala ona o Pope Penitito XVI o se tasi lenei o taitai poo Tama Paia sa faapea ona tulai mai o se taitai sa iloga foi ona faaaloalogia e ona tagata lotu e ui ina e lei leva ni tausaga talu ona filifilia o ia e suitulaga i le afioga Pope Ioane Paulo II. O le tuumalo o Pope Ioane Paulo II i le tausaga e 2005 sa faapea ona faaeaina mai ai Pope Penitito XVI, ma e faamavae nei ua faatoa 8 tausaga o lana nofoaiga.
O le faamavaega a le Tama Paia e ui ina ua faalauaitele nei ma ua mae‘a foi ona ia saunoa ma faalauiloa i le lalolagi i luga o televise lana faamavaega peitai o loo ia nofoia pea le nofoa o le Tama Paia se‘i oo atu i le aso 28 o Fepuari 2013, o le aso lea o le a ia faasee ese mai ai loa ma le taitaiina o le Ekalesia Aoao.
O Pope Penitito XVI e tele nisi o matatia na ia ausia a o soifua mai i totonu o le Ekalesia Katoliko, ma se‘i oo atu lava ina faamanuiaina lona soifua i le tofiga Katinale.
O se tasi o tofiga o loo faamauina i le talafaasolopito a le Ekalesia, o ia lea o se tasi o Katinale pito i umi, pe tele foi tausaga o tautua i lea tofiga nai lo se isi lava Katinale talu mai tausaga e tele o le talafaasolopito a le Ekalesia.
E lauiloa Pope Penitito XVI ona o ia o se tasi sa avea ma faiaoga o le Tusi Paia i le tele o tausaga, mulimuli ane avea o ia ma Polofesa o le Tusi Paia i le itu tau i le aoaoina ma le faaliliuina o le Tusi Paia, o se tasi o galuega sa galue ai i le tele o tausaga i totonu o Roma.
O Pope Penitito XVI o se uluai taitai pito i matua lea ua filifilia i le tofiga Pope poo le Tama Paia a le Ekalesia Katoliko i le lalolagi atoa. O le 78 o ona tausaga sa faapea ona filifilia ai o ia, peitai o lenei ua toe faamave mai ae ua faatoa 86 tausaga o lona soifua.
E manatua Pope Penitito XVI e le toatele ona o lona atamai i aoaoga e le gata i aoaoga a le Ekalesia Katoliko, peitai o lona atamai i le suesueina o le Afioga Paia a le Atua.
O se taitai iloga i lona loto ma lona naunau i le faatāuaina lea o le soifua faaleagaga o tagata lotu Katoliko i totonu o le lalolagi. O se tasi o vaega o lana lauga talu ai nei lava, na ia pulunaunau ai i tagata lotu o le Ekalesia ina ia toe foi mai i le Atua ma le mafutaga vavalalata ma Ia. O lona soifua tautua ma le leva ona auauna ai i tofiga eseese o le Ekalesia aemaise lava i le tofiga Katinale, na lei faigata ai ona filifilia o ia e avea ma Pope ina ua tuumalo le afioga Pope Ioane Paulo II.
I le taimi nei o le a potopoto foi le saofaiga o Katinale a le Ekalesia i le lalolagi atoa auā le filifilia lea o se tasi e avea ma Tama Paia e suitulaga i le afioga Pope Penetito XII. E ui ina toatele i latou o loo faapea ona faia i ai le filifiliga, ae foliga mai o loo iai lava nisi ua ave i ai le faamuamua a isi foi Katinale ma lo latou talitonuga o le taimi lenei ua tatau ona tulai mai ai. E 117 i latou o le a faapea ona faia i ai le filifiliga poo ai sē ua agavaa ma tatau ona tulai mai e faaauauina galuega a le Afioga Pope Penitito XVI. E iai le faamoemoe o le masina o Mati o le tausaga nei lava o le a faataunuu ai lenei faiga filifiliga, ma iloa tonu ai loa se tasi o le a avea ma Tama Paia, pe a faapea ona faasee ese Pope Penitito XVI mai le Ofisa Tutotonu a le Ekalesia.
O loo iai nisi o tusitusiga o loo ta‘ua ai le nofo ai pea o Pope Penitito XVI i totonu o le Vatikana e tusa lava pe o le a lē toe avea o ia e fai ma Faaao o le Ekalesia Katoliko o le lalolagi. O le faamavae mai o Pope Penitito XVI mai le tofiga taitai o le Ekalesia Katoliko, ua atoa ai i le tausaga lenei ua faamavae mai ai, le 600 tausaga talu mai ona iai se isi sa faapea ona faamavae foi i lenei tofiga.
O Pope Gregory XII sa faapea ona avea o ia ma Faaao o le Ekalesia Katoliko i le tele o tausaga ua tuanai, ma sa ia faamavae mai le tofiga o le Tama Paia i le tausaga e 1415. E oo mai i le taimi nei ua 600 tausaga talu mai lea taimi, a o lenei faatoa toe maua ai foi se isi Pope ua faamavae aloaia mai i lenei tofiga tuuoti a le Ekalesia Katoliko.
O le faamavaega a le afioga Pope Penitito XVI e mafua mai lea i lona soifua matua, ma ua lē atoatoa foi lona malosi i le tino auā le faaauauina o ona tofiga, aemaise o le faiga o ana faaiuga i mataupu uma e talanoaina i totonu o le lotoifale a le Ekalesia Katokio atoa i le lalolagi.
