Tetee leoleo sinia i le faaoolima mataga ma le faasotoma

Ua faaulu le tali tetee a le leoleo sinia o le Matagaluega o Leoleo ma Falepuipui i ona moliaga e 6 e aofia ai moliaga e lima o le faaoolima mataga, ae tasi le moliaga o le faasotoma. E le o mafai lava ona faailoa le suafa o le alii leoleo, ae o le Aso Gafua o le vaiaso nei o loo iloiloina ai e le faamasinoga faaitumalo le talosaga tetee a le itu a leoleo o loo tauave e loia a le Malo, i le faasalalauina lea mo le silafia o le suafa o le alii leoleo sinia.
O le alii loia o Ameperosa Roma o loo tulai mo le o loo molia, o ia foi na tuuina atu le tali tetee ina ua toe valaau le mataupu i le Aso Lua, 3 o Mati 2009, lea ua faatulaga mai ai e le faamasinoga o le masina o Iuni e suesueina ai le mataupu ma valaauina molimau e toalima a leoleo. O le faalapotopotoga o le Toomaga mo Ē Puapuagatia le Samoa Victim Support Group, na sulufai i ai le tamaititi e ana le tagi faasaga i le leoleo sinia. O le mataupu lenei na aliali mai i le falepuipui o tamaiti laiti ma tupulaga talavou o loo i Olomanu i Mulifanua a o tuli ai se faasalaga o le pagota laititi e ana le tagi ua taoto nei i luma o le faamasinoga.
Na mafua ona manaomia le fesoasoani a le Toomaga o Ē Puapuagatia ona ua fiu le tamaititi e alu i leoleo ma faatoai i ai lana tagi, e leai lava se suesuega na faia, ae o fetusiaiga i le va o le faalapotopotoga ma le Komesina o leoleo na vave ai loa ona tuuina atu le mataupu mo le faia i ai o se suesuega faalotoifale a le vaega o amioga taupulea a le Matagaluega, le Police Professional Standards Unit, ma tuuina atu i le Loia Sili mo se fautuaga, lea na fautuaina ai le faia o ni moliaga faasolitulafono o le leoleo sinia.