Sasao faaafi solitulafono aafia ai tamaloloa ma latou fanau teine

Ua sasao faaafi i Samoa soligatulafono e aafia ai feusuaiga fai faamalosi e tamaloloa ia latou lava fanau teine, ma ua le tuua ai lava se avanoa e le tulafono ia i latou ua faamaonia moliaga o le faiaiga faamalosi, le pule le uma, faaoolima mataga, ma le mataifale, e aafia ai le itupa o alii ua fai aiga (toalua ma le fanau). Ua savalia le masina lona tolu o lenei tausaga 2009, ae ua molimauina e le o motusia le solo o mataupu faapea e taunuu atu i le faamasinoga mo le faia i ai o ni faaiuga.
E lua ni mataupu lata mai ua faia i ai ni faasalaga faafalepuipui e aafia ai ni tamaloloa se toalua na laua faia ni solitulafono tau feusuaiga fai faamalosi ia la fanau teine. O le a le faailoaina suafa poo nuu ona o le fia puipuia o tamaitai na aafia. O le tausaga na tea nei 2008 na molia ai e leoleo se tama 36 tausaga i moliaga e ono o le faiaiga faamalosi ma lona afafine 13 tausaga le matua. O ia faiga solitulafono na faamatau ai e le tamaloa lona afafine i le mea na te faia ia te ia (afafine) pe ia tau i lona tina poo se isi o le aiga.
O nisi taimi sa feagai le teineititi ma ni mafatiaga ona na faaalia i le fofogaina o le faaiuga a le Faamasino Sili, Patu Tiavaasu‘e Falefatu Sapolu, e sasa e le tamaloa lona afafine ae le malamalama le teineititi i le mafuaaga. Sa ioe le ua molia i moliaga uma e ono faasaga ia te ia, e ui sa tetee, ae na suia lana tali i le aso na faataoto e le faamasinoga o le a valaau ai molimau a leoleo. E 20 tausaga na amata ai se fua a le faamasinoga i se faasalaga ae na toesea tausaga e 4 ona o le faatoa molia lea o le tamaloa, faaopoopo i ai ma lona ioeina o moliaga e ui na umi se taimi na faatali ai lea suiga o lana tali. E 16 tausaga ua nofosala ai le ua molia i le falepuipui.
I se tasi o mataupu faapea na fofogaina ai se faaiuga a le Faamasinoga Maualuga i le faaiuga o le masina o Fepuari 2009, o se tamaloa foi ma lona afafine. I le faaiuga tusitusia o loo taua ai e faapea o faamaumauga a leoleo o loo iloa ai, o se vaitaimi o le tausaga e 2002 i se tasi o po a o moe le na aafia, na alu atu i ai lona tama ma taumafai e tatala lona ofuvae laititi. Peitai sa musu le na aafia ae na faaauau pea le gaioiga seia oo ina taunuu i ooooga ina ua faamalie le tuinanau o le tamaloa. E tupu lea gaioiga mo le taimi muamua e le o iai le tina i le fale.
O se vaitaimi o le tausaga e 2006, tusa lea ma le tolu tausaga na mavae ai, ae toe faia le isi osofaiga a le ua molia i lona afafine, lea na faaalia i faamaumauga a leoleo e pei ona sa toe tolaulau i le faaiuga, na etoeto ai ma susu e le ua molia susu o le teineititi ma taualuga foi i se faiga aiga fai faamalosi. E iai ni moliaga faaopoopo na toe faaui i tua e leoleo ae totoe ai na o le moliaga e tasi o le faamalosi o se tamaitai, ma le faiaiga ma se teineititi e i lalo ifo o le 12 tausaga le matua. O moliaga ia na fua i ai le faaiuga a le faamasinoga. O itu ogaoga sa silasila i ai le faamasinoga o le talepe o le faatuatuaga na ave e le teineititi i lona tama, ma le isi o lona lava afafine moni na aafia.
E 12 tausaga na amata fua i ai se faasalaga faafalepuipui a le faamasinoga, peitai na toesea isi masina ona o le faatoa tulai lea o le tamaloa i se solitulafono e ui e iai sona moliaga tau solitulafono o taavale afi ua fai si tele o tausaga talu ona maea. Na totoe ai tausaga e 10 ua faasalaina ai lea tama i le falepuipui. Ua feiloai ai i laua nei ua faasalaina ma nisi foi o tamaloloa o loo tuli faasalaga ona o nei lava soligatulafono i le va o tama ma a latou fanau teine. O loo iai le faanaunauga o le faamasinoga o le a avea le mamafa o faasalaga ua faia e tau tuuitiitia ai moliaga faapenei e oo atu i le faamasinoga.