Ua malie lava le alu o le tautinoga a si tama o Siaosi lea faatoa mamulu mai lea aso, ae ua na o le talie o le au tamaitai o Pina ma Luama ma tilotilo le isi i le tasi, ona atonu sa mamao i o la mafaufau e mafai e Siaosi ona mamulu mai fafo si ana misiterio lea ua leva lava ona tau iteite i ai le au tamaitai lenei, mai lava i le aso muamua na vaai ai Siaosi i si teine o Luama.
Ae o le itu na alolofa ai teine i si a la uo, ona o le ova o lona faamaoni i lona matai le alii aoao, lea ua taofiofi ai lava ona lagona sa manao ai mo Luama, ae ua ave lava le faamuamua ma le faaaloalo ia Pula.
Ua toe oso mai le isi fasi tala a Siaosi, “Ana iloa lava o faailoa pea ou ia faalogona, sei fai ai se ma tauvaga ma lau kama o Pula poo ai o maua e malo i le foga uumi lenei ua tauau ina valea ai ulu o tagata.”
Ua faasesepa atu mata o Luama ia Siaosi, ae ua lili vale lava si tama pei ua sese le mamulu atu o lea tala. Ae na vave ona faalava ane Pina e tau faamama le ita o Luama lea ua tau oso ae ia Siaosi, ‘Ae o le mea lava ia ua toe sasao mai nei tatou ae ua fai si tuai o le a alu le pasi, a ea?’ ua toe talie le toatolu lea, ona faaauau ai lava lea o isi a latou tala.
Ua latalata i le itula e fa i le afiafi ua amata foi ona tau leai atu lava ni tamaiti aoga o toe foeai i le taulaga, ona fai loa lea o le tonu, o le a alu Siaosi e savavali atu ma teine i le maketi fou lea e tatau ona o e pue ai le la pasi a Vaivase e toe foi ai i le fale, ona faatoa sau ai lea o ia savali agai i uta i le fale o Amau tuai, e faatali ai le pasi e agai ai le latou nuu i le itu i sisifo o Upolu. Ua faataga toe teuteu lelei tala faatulafale a Siaosi e momoli ai le faafetai ia Luama ma Pina i le la agalelei e faatau se meaai mo ia.
Na uma le faafetai sosoo ai ma faamanuiaga mo le malaga a le teine Niu Sila, aemaise foi o nai upu apoapoai faaletuagane ina ia tautuana lana malaga atu lea atunuu malulu, nei seetia i le molemole o nanu a tamaiti Kiwi, galo mai nai tama suluie.
O lauga lava nei a Siaosi o loo fai ma toe talie ai le latou laulau, peitai na uma loa ma faatalofa ona savavali mai loa lea i fafo o le toatolu lenei, ma agai atu i le maketi fou. E feauga lava le oo atu o le solo lea i luma o le faleoloa o Molesi i Savalalo, ae latou faalogoina le faaee atu o le pu o se taavale.
Muamua na leai se isi o latou e ano tele i le pu lea, ona e toatele isi tagata o loo feoai solo ai luma o le faleoloa. Peitai a o savavali pea, e foliga i le latou faalogo, o lea e foliga o loo avaavau atu le faaeeina o le pu, ona iu ai lea ina liliu Siaosi ma tepa mai i tua.
“Auoi, e pei uma lava o le lua kasegi foi lea e masani ona momoli atu oulua i le aoga, lea e sau i tua lana taavale,” o le nati atu lea a Siaosi, ma faatautu ai loa Pina ma Luama ma faliu uma mai i tua.
E moni lava, o le tamaitai o Aolele lea ua tu atu lana pikiapu. “Oka oka, suga lega aoga. Lona uiga o lena faatoa lua tuua? Lea alii o le a tatou manava faatasi i le fale. Feosofi mai tatou o faatasi.”
Ua fetilofai nai teine pei ua tau mamā i le mataupu a Aolele lea ua tau fai ifo, ona faatofa atu loa lea ia Siaosi ma fai i ai e alu loa ia, o lea o le a latou o faatasi ma le la kasegi. Ua faatofa mai Siaosi, ona feosofi loa lea o Pina ma Luama i totonu o le taavale a Aolele.
“Ao le a le mea ua lua tuai ai i le fale i lenei aso? Ai o fiu si loomatua e faatali ane oulua i le fale,” e fai lava tala nei a Aolele ma alu le taavale, ae e tau sāua lava i le faalogo a teine e pei ua le o fiafia le la teine ia laua.
O Luama lava la na tali, ae o loo lālā vale lava taliga o si teine o Pina. “Se leai, na matou o mai ma si tama lea o Siaosi, si a ma uo lava lea e masani ona matou faifai mea faatasi i le aoga, ae ua ou fai ia Pina o le a fai sau faainu i si tama ona o lou aso mulimuli lenei i le aoga, ma matou faamavae ai loa. Ia ae na o nai hamburger lava ma le ipu inu sa momoli ai le faafetai i nei aso sa matou mafuta ai ma si tama.”
O le tali lea a Luama na toe kiliki ai ia Aolele, o le aso mulimuli lea o si ona tei o Luama i lana aoga, lea foi la ua vave ai ona malamalama lona mafaufau i le mafuaaga ua tuai ai ona oo le toalua lea i le fale. I le taimi e tasi ua leaga ai ma faalogona o Aolele, ona mua ona pisi i lana galuega, ae sa mafaufau e fai sana ia lava foi faainu i si ona tei faapea ma si teine o Pina, a o lei tuua e Luama lana aoga. O loo alu pea le taavale, ae ua tetei teine i le toe afe o le taavale i le fale pizza, ma amata ota loa e Aolele pizza lapopoa e tolu.
“Suga, e fai lava lua mea ae sei toe faamanatu mai foi e se isi o lou aso mulimuli lenei Luama i le aoga. Sa tatau ona ave sau faamavaega i si tou vasega aemaise foi i faiaoga.
A o oe foi Luama sei toe faamanatu mai. E mataga lou nofo faapea ae le sei faaali se faafetai aloaia i si au aoga. Anyway, e fai lava se mea i le vaiaso fou. Ae sei ota tatou pizza ia e fai ai se tatou pati nanei ma si loomatua. E a, e le fia valaaulia mai lua malo masani o Pula ma Onosai?” e fai lava tala a Aolele ma ata e pei e amumau le tauina o igoa o Pula ma Onosai.
Ua taufai oso uma atu Pina ma Luama, ‘E se tuu ia na Pula ma na Onosai’ ua lava a tatou ma auntie Filo e fai le tatou pati nanei. E leaga foi le ki faaleotele o le tatou laau pese ma fai tatou lava faiga siva. Ana iloa lava o taofi mai Siaosi e faatalie ai le tatou pati. Na ona tau lava o le igoa o Siaosi, toe mimilo e Aolele ma le taavale, ma toe faasaga mai le afi i le itu lea na ia pikiina ai Luama ma Pina, ae savali ai Siaosi.
Ua toe sau i le atoa le taavale, ma fai atu lava Aolele i le au tamaitai lea e fetilofai solo poo le a le uiga o le gaoioiga lea ua toe fai e Aolele, o lea o le o e tuliloa pe toe maua atu Siaosi, ae tauanau e nofo latou te tafafao i le afiafi momoli ai i le latou aiga.
E vaai mamao mai lava le toatolu lea, o loo tutu matilatila atu lava Siaosi i autafa o le fale faatalipasi i le maketifou, ma e latalata mai loa le latou pikiapu, ae amata ona savali Siaosi i se pasi o loo tu. Na toe faalogoina foi e si tama o Siaosi le soona avaavau atu o le pu lea e faaee atu, ma le vaai mai, o le pikiapu a Aolele ma si ana galu teine lea ua toe agai atu.
Na valaau Luama ia Siaosi ona alu ane lea, ma faamatala loa i ai e Aolele le latou tonu lea ua fai. Na tau mafaufau si tama mo sina taimi, ona ioe ane loa lea ma oso i tua o le pikiapu, ae fai i teine pe mafai ona sei vili atu lona aiga e tau i ai o ia e tuai atu.
Na toe agai le pikiapu i le fale pizza, ma e fetaui le oo atu ae ua ready foi pizza e ave, ma agai loa le pikiapu i uta i Vaivase, lea o loo faatali mai ai si loomatua o Filo, ma le atuatuvale poo fea lava o iai le aoga a Luama ma Pina, o lea ua toeititi ta le ono i le afiafi e lei oo atu lava.
Ua taunuu le malaga ma faamatalatala mea uma na tutupu i lea aso, ona faapea mai lea o le loomatua, ‘Ia o loa e sui lua lavalava aoga ma aveane se ie solosolo e sui ai si tama lena, ona o mai loa lea e tapena le tatou meaai o le afiafi.
Ua faamasani atu si tama o Siaosi i le loomatua, ma e ofo si tama i le faimea malie o le loomatua, aua e lei leva lava ona talanoa ae faapea ane loa Filo ia Siaosi, “ia o le po lava nanei e tatau ona faaali uma ai au siva na ua leva ona nanā. E te le alu i le tou aiga pe a le malie le matou matamata i lau siva.”
E faia pea
