Tuuaia le faaletonu ona siaki uta mai Apia

O se malaga a le Lady Naomi mo Pago Pago na molimauina le faatoatoa ai ona sue lelei uta e pei o taga talo e taifau sosogi a o lei tuua e le vaa Apia, e mafua ona ua tuuaia e le vaega o le tiute a Amerika Samoa le le lelei ona suesueina o uta, na mafua ai ona sao atu se taga talo na fafao ai ma se fasi paipa uga PVC ua utu i ai lau mamago o le laau faasaina o le maruana.
Faaalia e se sui o le vaega o le tiute ma leoleo o loo faia le galuega o le siakiina o uta e aveese ma uta e taunuu e faaaoga ai taifau sosogi, o loo faia foi a latou suesuega pe faapefea ona le maua e taifau i Apia, ae maua e taifau i Pago Pago. E iai se isi mataupu na maua ai foi ni maruana i luga o se vaa lauoloa o loo galulue ai nisi o alii Samoa na afea Tutuila, ae maua ai e le vaega o le tiute.
O loo talitonu alo Samoa sa galulue i le vaa o le Forum Line na maua ai maruana, o se mea na fafau e le vaega o le tiute a Tutuila. O loo iai foi masalosaloga pe atonu o se mea faapea na tupu i le taga talo na maua i ai le fasi paipa PVC ma maruana. Peitai o lipoti mai Amerika Samoa o loo taua ai na tamoe ese le e ana le taga talo ina ia tatala e alii ofisa o le tiute mo le suesueina, ma o le mafuaaga lea o le iai o talitonuga, o le maruana na fafao atu lava i Apia a o lei oo atu le vaa i Tutuila.