O lea e tālia le toe taliu mai i fanua o le faigamalaga a le tamaitai Ofisa Sili o le Matagaluega a le Palemia ma le Kapeneta, le susuga Vaosa Epa, i se feiloaiga na agai e faatino i le va o ia o le sui o le Malo o Samoa ma se kamupani ua tau ai le vine, grape i Sini Ausetalia ua oo mai ripoti e foliga ua lē sa‘o le aufaigaluega faavaitaimi na avatu a Samoa mo le tauina o a latou togalaau.
O se tetee na lipotia mai i Ausetalia a le aufaigaluega faavaitaimi lea mai i Samoa nei na suesue ai loa le ofisa o le Palemia, lea e vaaia le polokalame lenei a Ausetalia ma Niu Sila, ua maua ai avanoa a le mamalu o le atunuu e saili galuega faavaitaimi i fafo.
O se polokalame ua faitau afe le aofai o tagata o si o tatou atunuu ua faamanuiaina ai e lē gata i Niu Sila ae faapea foi i Ausetalia. O le faamatalaga a le Alii Palemia i lana fonotaga faatoa mae‘a atu ma tusitala.
O le kamupani lea ua tulai mai ai le tetee a le aufaigaluega mai i Samoa e pulea e se tamaitai Ausetalia e faaipoipo atu i se alii mai i Tonga ma e foliga mai ua tau fai uiga faailoga tagata o le alii Tonga lea e ala i le faatinoga o galuega ma le totogi maua a le aufaigaluega mai i Samoa auā o le togalaau lea e na o Samoa lava ma Tonga o loo maua ai avanoa o ana aufaigaluega.
O le lē fiafia la o le aufaigaluega a Samoa i le faiga o i latou lea na mafua ai le tetee ua lē agai le aufaigaluega mai Samoa nei e faatino a latou galuega na tatau ona faagasolo i le iai i lea fale faigaluega.
Ta‘ua e le susuga Tuilaepa Lupesoliai Sailele Malielegaoi, o le tulai mai o nei ituaiga faiga, e tatau lava foi i le malo ona faaali le lagolago i tagata o lo tatou atunuu aemaise e tatau ona toe fesiligia ma faatalatalanoa ma pisinisi nei i fafo le faiga e talafeagai ma tagata faigaluega o loo avatu i atumotu laiti o le Pasefika.
O lea la na agai ai loa le tamaitai pule o le Ofisa o le Palemia aemaise le polokalame lenei o galuega faavaitaimi i Samoa nei ma o le a maua se faamatalaga o lenei feiloaiga pe a toe taliu mai le tamaitai Ofisa Sili.
Ua lua nei tausaga o faagasolo atu le aufaigaluega faavaitaimi a Samoa i Ausetalia mo nei avanoa e tau ai fualaau ‘aina i togalaau a Ausetalia auā o le amataga o le polokalame lenei e na o togalaau lava i Niu Sila na maua ai ia avanoa faigaluega.
