O le finagalo lea o le Vaega o Suesuega o fua o faaeleeleaga i Nuu o le Matagaluega o Faatoaga ma Faigafaiva. O le lelei o le tali mai o le faalelei eleele faalenatura lea ua faaaogā ma suesueina i le valu masina talu ai i maumaga na totō i nuu ma na faapea ona fafai i le faaiuga o le vaiaso.
O le faalelei eleele lea e ta‘ua o le mokuna o se laau e mai se vaega o Aferika, ma na faataitai ai le fafagaina o maumaga auā e pei o se fue e sosolo i le maumaga. Sa mulimulitai lava e le vaega lenei o suesuega i Nuu lenei laau aemaise o le aogā poo ā foi ni aafiaga e ono oo i ai i le valu masina e totō ai se maumaga.
Ua taofi ai le ono faaaogā o faalelei eleele masani a o ni vailaau foi e aveese ai le vao aemaise o le fana ai o tiapula. Ma o se faiga ua unai e le Matagaluega le aveese ona o le aafia ai o le eleele, le siosiomaga ae o le afaina ai o le soifua o le tagata e tagofia le i‘o o le talo lea e fana i le vailaau.
O le Ofisa Sili Lagolago ia Misa Konelio Misa na feagai ma lenei suesuega i Nuu e pei ona fesootai ai ma le toatele o le au faifaatoaga o le atunuu o loo iai atinae e pei o maumaga. O le toatele foi o faifaatoaga nei ua faia atinae mo le faatau atu o le talo i fafo aemaise i Niu Sila lea ua matuā siitia ai lava le taga talo ua avatu i le masina.
O le vaivai o le talo ua mafai ona avatu e Fiti ua faaalia e Misa e matuā tāua ai lava le agai loa o Samoa e toe unai lana matai‘ai i Niu Sila auā o le talo lava na tupe silia i tausaga ua mavae i lenei fua o faaeleeleaga; ae talu ai le lega ua faigata tele ai ona toe foi Samoa e ave le talo i fafo. O lea ua talia e Niu Sila ma ua oo atu i le 15 i le 20 faigamalaga o vaa ma uta talo i le masina ma o se siitaga maoae i lenei foi fua o faatoaga.
O lea ua agai foi mo Ausetalia e ui o loo tālia suesuega ma se lipoti mai le ofisa o faatoaga a Niu Sila ma le vaega o gaosi oloa ma faatau oloa i fafo le SAME e ave i Ausetalia e faamautu ai le lelei o le talo lea ua avatu i Samoa mo le faatauina i Niu Sila aemaise Ausetalia pe a talia.
O le mafuaaga foi lea ua saga unai ai e le matagaluega o Faatoaga i Samoa le faiga lenei ina ia mautinoa na o auala lava faalenatura o loo totō ma faaola ai nei laau a o lei avatu i maketi i fafo ua avanoa mai i lenei taimi mo le talo a le atunuu. Ua avatu le mokuna i le au faimaumaga auā le faataitai ia latou foi atinae.
