E $98,000 tupe Amerika ua foai e Iapani i le nofoaga mo suesuega fasaienisi a Samoa e faatau ai ni masini e mafai ona maua ai le suauu manogi o loo mafua ai ona manogi le mosooi, le laau o le oketi ma isi fugalaau manogi o loo maua i o tatou laufanua.
O se poloketi na faamatala le pule sili o le nofoaga suesue i Nafanua le afioga Tilafono David Hunter, o le a avanoa ai nisi oloa gaosi e mafai ona gaosia lava i Samoa e atinae ai nisi alamanuia tau tupe maua mo o tatou tagata.
O le tasi itu lelei i lea taumafaiga ona o le a mafai ona faateleina ai laau e manogi o latou fugalaau i se faiga faasaienisi e pei ona ta‘ua e Tilafono. O le silasila a le nofoga suesue a oo ina maua se tali o a latou suesuega o le a mafai loa ona tufa atu i le au faipisinisi o togalaau faamatagofie poo o ornament plants.
O se suesuega foi na faaalia e Tilafono o le a mafai ai e le komiti mo le faamatagofieina o le taulaga ma le pulega o tagata tafafao, ona maua le avanoa e toe faateleina ai nisi o laau e fua matagofie auā le faia o togalaau i le taulaga.
O atunuu i fafo o loo pito maualuga ai lenei ituaiga o atinae ona o loo faatau atu i isi atunuu fugalaau eseese, ma e oo foi i fugalaau manogi o loo mafai ona maua le suauu manogi mai fugalaau ona ave lea e gaosi ai oloa e faamomosi ai tino o tamaitai ma alii, lea e mafai ona gaosi ai fasimoli manogi ma fagu sausau.
O kulimi foi ma isi oloa teuteu tino e mafai ona gaosia ai mai suauu manogi o fugalaau. “O le isi lena atinae lelei mo Samoa pe a manuia a matou sailiiliga auā a manuia e maua e pisinisi o loo gaosia ia ituaiga o oloa le avanoa e faateleina ai maketi mo a latou taumafaiga.
O le alii Amapasa o Iapani i Samoa le afioga Tuimaugaoalii Kazumaza Shibuta na avea ma sui o lona malo e sainia le faamautuina o le foai mo le seleni o le a maua e le nofoaga mo suesuega faasaienisi a Samoa.
O le nofoaga lea ua latou faia foi suesuega ua mafai ai ona gaosia le falaoamata mai le fua o le ‘ulu. O loo faaaogā nei e le kamupani gaosi avamalosi i Vaitele o le Vailima lea faiga e gaosia ai se tasi o ana pia poo avamalosi e maua mai i le ‘ulu.
O loo ua mafai foi ona gaosia i Samoa le suauu mai le fua o le laau o le avoka, ona o sailiiliga a le nofoaga.
O nisi o pisinisi ua latou gaosia lea ituaiga o suauu mo mea taumafa ua latou utu fagu ma faatau i faleoloa le suauu mai le avoka, aemaise o loo faatau atu foi i atunuu i fafo.
